Shillong, Naitung 20
Ka Coordination Committee on International Borders (CCIB) ka pynpaw ba kam don jingpyrshah ïa ka jingker sainar hapdeng ka Jylla bad ka Ri Bangladesh, hynrei ka Sorkar ka dei ban pynbeit shuwa ïa u pud u sam kumjuh ban ïakren sngewthuh jingmut ruh bad ki trai jaka.
Ha ka lah Sngi u Blei ka CCIB ha ka jingïalam u Chairman u Bah Kmen Myrchiang ryngkat u Assistant Education Secretary ka Khasi Students’ Union seng kmie u Samla Andrew Gary Dkhar, u Vice-President ka KSU West Jaiñtia Hills u Samla Chanbor War ka la ïoh ban ïakynduh ïa u Naval Singh DIG, BSF ha Shillong ban ïakren sani bha haba ïadei ka kam pud.
Haba kren sha ki nongthoh khubor u Bah Kmen u la ïathuh ba ka jingïakren jongki bad u DIG ka long kyrpang ïa u Mawpud 1272 haduh 1278 u ba don hapdeng ka Wah Umngot.
U la ong ba katkum ka Agreement hapdeng ka Ri India bad Bangladesh ba naduh u snem 1958, ka kdew ba u mawpud u dei ban long hapdeng ka Wah Umngot, ha kaba kine ki artylli ki ri ki ïoh ban pyndonkam ïa ka wah, hynrei ha kine ki sngi ka wah Umngot baroh kawei ka la hap ha ka Ri Bangladesh kaba la pynlong ban sngewkhia ïa ka kynhun.
U la buh jingkylli ïa ka Sorkar Pdeng bad ka Sorkar Jylla balei ba ki sngap jar haba ïadei bad kane.
U la ban biang ba ka kynhun kumjuh ki nongshong shnong ka thaiñ kim pyrshah ïa ka jingker sainar, hynrei ka Sorkar ka dei ban wan ïapynbeit shuwa ïa u pud u sam khamtam ban ïakren phylliew jingmut ruh bad ki paidbah nongshong jong ka thaiñ kiba long trai ïa ka jaka.
Shuh-shuh u la ong ba, lada ka Sorkar ka kam ba ka la dep ban pynbeit ïa u pud u sam, ka dei ruh ban ker sainar naduh u Zeroline, khnang ba ki jaka baroh kin long trai da ki nongshong shnong.
U Bah Kmen u la ïathuh ba na ka liang u DIG hadien ba u la sngapthuh ïa ki jingeh bad ki jingpynpaw jong ki, u la kular ba un rah ïa kane ka mat sha ka Sorkar ban ïakren sani bha halor kane ka kam.
