Jowai, Naitung 20
U MDC jong ka VPP u Ma Jamshaphrang Pohtam u la wanrah ïa ka motion halor ka jingdonkam ban ‘codify’ ïa ki riti kolshor tynrai bad ki rukom shad tynrai hapoh u pud u sam jong ka JHADC.
U Ma Pohtam u la wanrah ïa kane ka motion ha ka Dorbar lyiur ne Summer Session kaba shi sngi jong ka JHADC ha ka 20 tarik Naitung.
Nalor katei ka motion, u MDC ka VPP ula wanrah ruh sa kawei ka motion kaba ïatai halor ka jingkhaïi da ki bar jylla hapoh u pud u sam jong ka JHADC bad hato kan long ka jingmyntoi ne ka jingduh nong.
Katba na ka liang jong ka Kong Laiawanlamjinghun Khyriam kaba long ka MDC jong ka VPP ka la wanrah ïa ka motion ban dawa pynneh ïa ki lum ki wah, ki pung um bad ki wahduid bad ki tyllong um baroh hapoh u pud u sam jong ka JHADC.
Shuh shuh u MDC jong ka VPP u Ma Nehemaia Lamare, ula wanrah ïa ka motion ban dawa ïa ka jingpynneh pynsah bad kyntiew ïa ka hok jong ki trai shnong hapoh u pud u sam jong ka JHADC.
U MDC jong ka Congress u Ma Rikut N. Parien u la wanrah ïa ka motion ban ïatai halor ka jingdonkam ban shim land holding certificate ïa ki jaka puta ba dei jong ka JHADC bad ka Sorkar Jylla.
Haka jingjubab jong u ïa kawei pat kawei ka motion, u Chief Executive Member jong ka JHADC u Ma Thombor Shiwat ula kular ban shimkhia halor ka jingai jingmut jong ki MDC bad hadien ka jingpynshai na u Ma Thombor baroh saw ngut ki MDC ki la weng noh ïa ka motion jong ki.
