Shillong, Naitung 20
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Ernie Lurmangkara Rapthap u la ai ka jingujor ba ha ka 16 tarik mynta u bnai, uwei u runar bym ithuh u la prong tuh hapoh ka jaka jong u kaba don ha Umsohsun, Shillong bad ha kaba u la tuh bad pynlynruh lynram ïa ka jaka. Ïa kane ka jingjia baroh, la ïoh ban ring dur ha ka kor CCTV.
Katba na ka liang jong u Daniel W Marbañiang u la ai ka jingujor ba ha ka 16 tarik mynta u bnai, ha ka por kumba 10.30 mynmiet, ki runar bym lah ban ithuh, ki la tuh ïa ka arshaka kaba don ïa u registration number ML05-Y-6514 kaba dei trai da u khunruid jong u na Mawlai Syllaikariah, Shillong.
Ha kawei pat ka khubor, u Shakib Nongrum uba na Laban, Lower Lumparing, Shillong u la ai ka jingujor ba ha ka miet jong ka 16 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-6027.
Kumjuh ruh u Pratap Rai u la ujor ba ha ka miet jong ka 17 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number AS05-AC-3439 na ka jaka najan jong ka Shillong College.
Ha kawei pat ka khubor, ka Lily M Marak ka la ai ka jingujor ba ha ka step jong ka 16 tarik mynta u bnai, ki runar bym lah ban ithuh, ki la tuh ïa ka masi na ka sem masi jong ka, kaba don ha Danakgre, Tura (WGH).
Na ka liang jong u Favian Lyngdoh ruh u la ai ka jingujor ba ha ka step jong ka 17 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-X-5052 na ka thaiñ Langkyrding, Mihngi Block-IV, Shillong.
U Apollos Khyriem ruh u la ai ka jingujor ba ha ka step jong ka 17 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AF-5171 na ka thaiñ Langkyrding, Mihngi Block-IV, Shillong.
Ha kawei pat ka khubor, ka Hiru Thapa ka la ai ka jingujor ba ha ka miet jong ka 14 tarik mynta u bnai, ki runar bym lah ban ithuh, ki la prong tuh hapoh ka phyllaw jong ka Arya Vidyalaya Secondary School, Shillong bad ban tuh ïa ki waiar ilektrik, kiba bun ki tiar tem kiba shongdor kumba T.15,000/-.
Na ka liang jong ka Mitali Roy pat ka la ujor ba ha ka 14 tarik mynta u bnai, ha ka por kumba 9 baje mynstep, ki runar bym lah ban ithuh, ki la prong tuh hapoh ka ïingsah jong ka, kaba don ha RR Colony, Rynjah, Shillong bad ban tuh ïa ka tyndong lyer shet jingshet (LPG cylinder).
Ha kawei pat ka khubor u Kalyan Karmakar u la ai ka jingujor ba ha ka 14 tarik mynta u bnai ha ka por kumba 12.05 shiteng synnia eiei, ki runar bym lah ban ithuh, ki la prong tuh hapoh ka quarter jong u ha 153rd Bn., BSF, Mawpat, Shillong bad ban tuh haduh arphew wei tylli ki battery kiba shongdor kumba T.2,54,554/-.
Ha ka 16 tarik mynta u bnai ha ka por kumba 2.30 mynstep, u Successly Wanñiang u la pyntip ba ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-X-1092 na ka thaiñ Polo Hills, Shillong.
