Shillong, Naitung 21
U Chief Electoral Offi-cer (CEO) ka Jylla, u Dr. B.D.R. Tiwari ha ka Sngi Ba-ar u la ong ba ki don haduh 323 ngut ki nongthep ‘vote’ ha Meghalaya kiba la kyntait ban pdiang ïa ki ‘Enumeration Form’ (EF) ha kane ka kynti jong ka Special Intensive Revi-sion (SIR) 2026 kaba dang ïaid shakhmat.
Haba ïasam ïa ki jingtip ba bniah jong ka jingtreikam ka ASDD, u CEO u la ong ba 53,908 ngut ki nongthep ‘vote’, kata 2.29% na ka jingdon ki nongthep ‘vote’ baroh ha ka Jylla, la pynithuh hapoh ki thup kyrdan ‘Absentee’, ‘Shifted’, ‘Death’ bad ‘Duplicate’ haduh mynta.
“Na kine, 5,795 ngut la pynithuh kum ki ‘Absent’, 13,379 ngut – ‘Shifted’, 32,382 ngut kum kiba la ïap, 2,029 ngut kum ki ‘Duplicate’, katba 323 ngut kiwei pat ki nongthep ‘vote’ ki la kyntait ban pdiang ïa ki ‘Enumeration Form’,” la ong u Dr. Tiwari.
U la ong ruh ba baroh kum kine ki jingjia, kynthup ïa kito kiba kyntait ïa ki phom, yn sa leh katkum ka ‘Registration of Electors Rules, 1960’, hadien ba la pynshisha bha bad da kaba ai lad ïa ki nongthep ‘vote’ kiba dei hok la ka long ha kano-kano ka bynta kaba donkam, hashuwa ban shim kano-kano ka rai halor ka thup kyrteng ki nongthep ‘vote’.
U CEO u la ong ba ka SIR ka la lah ban sam haduh 98.17% ki EF haduh ka 21 tarik u Naitung, 2026; kata 23,06,585 tylli ki phom kiba la sam na ki 23,49,645 ngut ki nongthep ‘vote’.
Ka jingpynïasoh lyngba ki lad ‘digital’ ka long 62.15% ha kaba la pdiang haduh 14,07,446 tylli ki phom.
Ka West Jaiñtia Hills, South West Khasi Hills bad South West Garo Hills ki la ïoh ïa ka jingpynpoi kaba 100%, katba ka West Khasi Hills ka la lamkhmat ha ka jingpyndonkam da ka ‘digital’ kaba long 79.86%.
U Dr. Tiwari u la pynkynmaw ba ki nongthep ‘vote’ ki bym lah ban aiti ïa ki ‘Enumeration Form’ ba la pyndap bha ha ka por ba la buh, kin ym shah kynthup ha ka ‘Draft Electoral Roll’ ka ban sa pynmih ha ka 5 tarik Nailar, 2026.
Lah ban pynpoi ïa ki phom sha ki BLO lane ‘online’ lyngba ka ‘ECINET App’ bad ka https://voters.eci.gov.in.
Na ka liang u CEO u la ïakynduh ruh ïa ki nongmihkhmat jong ki seng saiñpyrthei ha ka 21 tarik Naitung bad ïaroh halor ka jingthung ïa 892 ngut ki Booth Level Agent (BLA) ban ïarap ha kane ka kam.
“Ngi kyrpad ïa baroh ki nongthep ‘vote’ ba dei hok ban ai ka jingïatreilang bad ki BLO bad ban phah ïa ki phom ha ka por kaba biang ban pyntikna ba kin ïoh rung ha ka thup kyrteng bad ban pynkhlaiñ ïa ka ilekshon kaba ïashim bynta lang da baroh,” ong u Dr. Tiwari.
