Shillong, Naitung 21
Ka ïingbishar Supreme Court ha ka sngi Ba-ar kala bthah ïa ka Sonam Raghuvanshi, kaba shah kynnoh pynïap ïa la u kurim, ba kan rai haduh ka 23 tarik mynta u bnai la kan shu pyndem lane ïakhun pyrshah ïa ka jingmudui ka Sorkar Meghalaya ban kheiñ duh noh ïa ka jamin jong ka.
Ka ïingbishar u Justice MM Sundresh bad PB Varale kala shong bishar ïa ka jingkyrpad ka Jylla pyrshah ïa ka hukum ka ïingbishar Meghalaya High Court ba ai jamin ïa ka Sonam.
Ka ïingbishar kala tyrwa ïa artylli ki lynti. Ka Sonam ka lah ban leit pyndem hi katba ka ïingbishar ba tian bishar ka dang lum jingthoh ïa ki sakhi jong ki nongaisakhi lane ka ïingbishar kan shong bishar bad rai ïa ka jingkyrpad jamin jong ka katkum ka jinglong ka kam.
“La ngin pyrkhat bad pynmih ïa ka hukum katkum ka jinglong ka kam. Lane ngin pynmih ïa ka hukum ïa phi ban leit pyndem tad haduh ban da dep bishar ïa ki nongai sakhi, hadien kane ngin sa ïapeit ïa ka. Ka lynti kaba ar ka kham biang ïa phi. Shim ïa ka jingbthah bad sa wan biang,” ong ka ïingbishar.
Kala bynrap ba lada ka Sonam ka jied ban pyndem, kan sa bthah ïa ka ïingbishar ba tian bishar ba kan pynkloi ïa ka jingkhmih bniah ïa ki nongai sakhi bad sa shong pyrkhat biang ïa ka aplikeshon pan jamin.
Ka ïingbishar Meghalaya High Court kala ai jamin hadien ka jingpynpaw ba ki kot ki sla ba kem ïa ka Sonam ki kdew ïa ka kyndon 403 jong ka BNS ha ka jaka jong ka kyndon 103 ba pynïap briew, bad ba ym shym la pyntip bha ïa ki daw ka jingkem sha ka Sonam.
Ka Supreme Court kala buh jingkylli balei ba ïa kane ka kam la wanrah slem bad la kane ka jingbakla marwei kala biang eh ban ai jamin.
U Solicitor General Tushar Mehta, uba mihkhmat ïa ka Meghalaya, u la pynpaw ïa ka jingbakla ha ka rukom type bad ong ba ka Sonam ka tip bha ïa ki daw ka jingkem.
U pyntip ba ka Sonam kala pyndem ïalade tad hadien ba kem ïa ki paralok ba ïadonkti lang.
