Mawkyrwat, Naitung 21
Ka Dorbar Shnong Pyndenumsaw ha ryngkat ki bahaïing hasem bad ka KSU South West Khasi Hills District ha ka sngi Ba-ar ki la dawa ba ïa u Bailing Wahlang, 62 snem ka rta na ka shnong Pyndenumsaw uba la shah kynnoh ba u la pynïap ïa la ka jong ka para, ka Snity Wahlang (56 snem) ba u dei ban shah set phatok shi jingim, bad ki la maham tyngeh ruh ïa ki bor Sorkar ba lada une u briew un dang lait na phatok, “kin ym lah ban tehlakam ïa u paidbah lada ki shim ïa ka aiñ ha la ki jong ki kti”.
Ïa kane ka jingdawa bad ka jingmaham la pynpaw ha ka jingïalang kaba la long ha ka shnong Pyndenumsaw ban pynrem ïa utei u rangbah kum shibynta na ka Peace Rally kaba la pynlong da ka Dorbar Shnong Pyndenumsaw ha kaba la sdang na Madan Dommawlein haduh Lawtiehbah, Perjet, Domsaw Domrisai bad bad pynkut biang ha Madan Dommawlein bad la wan ban ïashimbynta da ki bahaïing hasem, ki samla pule, ki nonghikai bad ki nongshong shnong na ka shnong Pyndenumsaw.
Ka jingïalang kaba la pynïaid da u Myntri ka shnong Pyndenumsaw, u Bah Koland Marwein ha ryngkat ka jingïadonlang ki bahaïing hasem, da kawei ka sur ki la pynrem ïa u Bailing Wahlang bad ki la dawa ruh ba ka aiñ ka dei ban pynshitom da kaba set phatok ïa u shi jingim.
Haba kren ha ka jingïalang, u Bah Anderson Syiemlieh, dkhot ka Executive Committee jong ka shnong Pyndenumsaw u la ong, kane ka jingjia ka la wanrah ïa ka jingsyier bad ka jingtieng ïa ki paidbah ka shnong Pyndenumsaw khamtam eh ba une u briew u la leh ïa kane ka kam sang ha ka jaka kaba don marjan bad ka lynti shnong bad hajan ka station jong ka shnong khlem da salia ïa ki briew kiba ïaid ba ïeng.
U Bah Anderson u la ïathuh ruh ba ki paidbah ka shnong Pyndenumsaw lyngba ka Executive Committee ki la rai ban wad ïa utei u briew haduh ban da shem watla u la pyrshang ban phet krad, bad lyngba ka jingtrei shitom jong ki samla bad ki riew rangbah ha kaba wad ïa u ha ki kyndong kynshrot, khatduh eh ki la ïoh kem ïa u na ka shnong Rohbah.
“Nga kwah ban ai khublei ïa ki riew rangbah jong ka shnong kiba la lah ban tehlakam ïa ki paidbah kiba bitar bad kwah ban kput bad shoh ïap syndon ïa u namar ba u ju wanrah jingeh ym tang ïa ka ïing ka sem, hynrei ïa ka shnong baroh kawei,” ong u Bah Anderson uba la bynrap ba ka jingsniew jong une u briew ka la long palat ha kaba um salia ïano-ïano.
Ka shnong Pyndenumsaw ka dawa ba ïa une u briew dei ban set phatok shi jingim, bad u Bah Anderson u la maham ruh ba lada ki bor ba dei khmih ki dang pyllait ïa u, ka por kan poi ba kin ym lah shuh ban tehlakam ïa u paidbah, bad u paidbah na ka bynta ka jingshngaiñ jong ki hi, kin shim ïa ka aiñ ha la ki jong ki kti.
