Shillong, Naitung 21
Ka Meghalaya Pradesh Youth Congress (MPYC) ha ka sngi Ba-ar, kala dawa ba dei ban leh da kaba tyngeh ïa u nongïalam ka BJP Youth Wing halor ka jingkynnoh ba u la kynthoh jur ïa ka jingïakhih ki samla halor ka NEET ha Delhi bad ong, ba katei ka jingpynpaw ka jong u ka dei kaba khlem akor bad ka jingleh ka bym don nongrim.
Haba ïakren bad ki nongthoh khubor ha Shillong, u General Secretary ka MPYC u Bah Derrick Jyrwa u la ong ba kum u nongïalam ka BJP Youth Wing uba dei ruh nongïasaid aiñ u la ai ïa ka jingpynpaw kaba lam sha ka jingïaumsnam pyrshah ïa ki samla pule kiba pynlong ïa ka jingïakhih.
U Bah Derrick u la ong, “Shaei ka nongrim ka jong u kum u Nongïasaid Aiñ? Kane ka jingleh ka jong u ka long kaei-kaei kaba ym don satia ïa ka kyrdan ha ka kam (unprofessional). Ngi pynrem jur ïa u.”
“Ngi baroh ngi la ïohi ïa kaei kaba jia ha Delhi. Ki samla kila shah shoh bad shah tied. Une uba na ka Meghalaya uba pynmih ïa kum katei ka jingsngew ka long kaei-kaei kaba sngewlehraiñ bha. Phim lah ban ong, ba ki briew kiba pynlong ïa ka jingïakhih dei ban pynïap noh ïa ki,” u la bynrap.
U Bah Derrick u la ong ba katei ka rukom pynpaw ka pyni ïa ka jingduna ban sngewthuh ïa kaei-kaei kaba suk tam bad ka pyni ruh ïa ka jingduna jong ka BJP hi baroh kawei bad ha kajuh ka por u la kyntu ïa ka seng ba ka dei ban shim da ki sienjam bad dawa ba une u nongïalam u dei ban hiar shuki noh.
Ha kaba ïadei bad ka lynti jong ka aiñ, u Bah Derrick u la ong, “Ym ïa mynta. Ngin sa ïa shong pyrkhat ban leh ïa kaban sa wan. Lada ka BJP kam leh eiei, ngin ïaid shakhmat ha kaban pynlong da ka jingïakhih.”
Katba u State Chief Organizer jong ka Seva Dal u Bah Banphira Basaiawmoit u la ong ba katei ka jingpynpaw ka dei kaba ym lah ban pdiang satia da baroh ki nongshong shnong ka ri.
U la ong, kane ka jingjia ka dei ban pynkyndit bynriew kumno ki briew kiba don ha ka bor ki peit ïa ki samla pule.
Ka MPYC kala pynbna ruh ban phah ïa ka kynhun jong ki 4 ngut ki dkhot ban leit sha Delhi ha ka 22 tarik mynta u bnai.
“Ngin leit ban ïakynduh ïa ki nongïalam ka seng, ki samla kiba pynlong ïa ka jingïakhih bad kiwei-kiwei kiba donbynta lang kynthup ïa ki nongïalam ka CJP. Ngin leit ruh ban ïakynduh ïa ki samla pule kiba la shah bom shah tied ha ka jingïakhih ha ka sngi Nyngkong,” ong u Bah Banphira.
