Shillong, Naitung 21
U nongïalam ka BJP bad nongmihkhmat ka Pyn-thorumkhrah, u Bah A.L. Hek ha ka Sngi Ba-ar u la ong ba ka Sorkar ka dei ban pynlong ïa ka jingtohkit halor ka jingïakhih ba dang shen jong ki samla pule ba la ïalam da ka CJP hashuwa ban poi sha kano-kano ka rai halor ka jingdawa hiar shuki ïa u Myntri ne halor ka jingpyndonkam ïa ka bor.
Haba kylli halor ka jingïakhih ka “Cockroach Janata Party” bad hato ka seng jong u ka kyrshan ne em ïa ka jingdawa ki samla pule, u Bah Hek u la ong ba ka jing-sngewkhia kaba hakhmat eh jong ka seng ka long halor bha ka ka miat jong ki samla pule.
“Ngam sngewkhia ba ka dei ka seng saiñ pyrthei aïu. Ki don la ki jong ki jong ki jingmut bad ki jingpynsngew. Hynrei baroh ngi sngewkhia ïa ki samla pule jong ngi. Ki samla pule jong ngi ki shah ktah. Na ka bynta kano-kano ka daw kaba ïadei bad ka jingmyntoi jong ki paidbah jong ngi, ka dei ka kamram bad ka jingkitkhlieh jong ngi ban pyntikna ba kan ym don kano-kano ka jingeh,” u la ong.
Halor ka jingdawa hiar shuki ïa u Myntri, u Bah Hek u la ong ba dei ban pynshong nongrim halor ki jingshisha hashuwa ban shim kano-kano ka rai.
“Nyngkong ki hap ban peit kaei ka mat ba kongsan. Hadien ba la pynshisha bha, kano-kano ka rai ba ka Sorkar ka shim kan dei ka sienjam kaba biang,” u la ong.
Ha kaba ïadei bad ki jingkynnoh ba pyndonkam da ka bor pyrshah ïa ki samla pule ba ïakhih, u Bah Hek u la ong ba ïa kane ka kam, dei ban ieh ha ka Sorkar Pdeng bad ban jur halor ka jingdonkam ban ïaid shakhmat bad ka jingwad bniah.
“Lada phi kylli ïa nga, ngi ieh ha ka jingstad jong ka Sorkar Pdeng ban leh ïa kaba dei halor kaei kaba la jia. Ki tnad aiñ ruh ki donkam ban pynshisha ïa kaei kaba jia ha katei ka jaka. Ngim tip ïa ka jinglong-jingman kaba tikna hangtei,” u la ong.
U Bah Hek u la ban jur ba ka jingpynrem khlem da pynshisha shuwa kan long kaba dang kloi eh.
“Kum ka jingkitkhlieh jong kano-kano ka Sorkar, hap ban leh ïa ka jingtohkit. Khlem ka jingtohkit, ngi donkam nyngkong eh shuwa ïa ka jingwad bniah. Ngim lah ban kren ïa kum kine ki jingkren khlem da pynshisha shuwa. Hashuwa ba ngin kren pyrshah ïano-ïano, ngi hap ban pyntikna ïa ki jingshisha. Khlem ki jingshisha, ngim lah ban shu kren ha lyer,” u la ong.
U la kyntu shuh-shuh ïa ki paidbah ba kin phai ruh sha ki bynta kiba bha jong ka synshar-khadar.
“Ki briew ki peit tang ïa ka bynta kaba sniew. Ngi hap ruh ban ïohi ïa ka liang kaba bha kumjuh. Haba ngi pyntreikam ïa kano-kano ka kam pynroi ne ka polisi, ka hap ban ai jingmyntoi ïa ki paidbah,” la bynrap biang u Bah Hek.
