Shillong, Naitung 21
Ka Confederation of Meghalaya Social Organi-zations (CoMSO) ha ka sngi Ba-ar jong ka taïew, ka la dawa ban pynlong da ka jingtohkit kaba khlem shah liang halor ka jingkynnoh ba ki pulit ka Nongbah Delhi, ki la pyndonkam da ka bor pyrshah ïa ki samla pule kiba ïakhih ha Delhi
Ha ka kyrwoh ba la phah, u Chairman ka CoMSO u Bah Roy Kupar Synrem u la pynrem jur ïa ka jingleh jong ki pulit ïa ki samla bym don tiar ïaleh, kiba pynlong ïa ka jingïakhih kaba suk.
U Bah Roy Kupar u la batai ïa ki khubor bad ki dur kum kiba pynsngewsih jur bad u la ong, ba ki pynjah burom ïa ki jinglong jong ka riti synshar ka ri.
Ka CoMSO ka la pynskhem, ba watla ka jingpynneh ïa ka aiñ shongsuk shongsaiñ kadei ka kamram jong ki bor synshar, hynrei dei ban leh da kaba tehlakam bad burom ïa ki hok jong ki.
“Ka sorkar India kadei ban sngap ïa ki jingangnud jong ki samla jong ka ri bad ban pynbeit ïa ki jingdawa ba dei hok jong ki ha ka rukom kaba hok bad kaba shai,” la ong u Bah Roy Kupar ha ka kyrwoh.
Ka kynhun ka la kyntu ba ïa ki jingeh jong ki nongïakhih, dei ban pynbeit lyngba ka jingïakren ym da kaba pynbor, bad ka la kyrpad ïa ki nongïakhih ba kin ïai bteng ban ïakhih da kaba suk bad da ka jingkitkhlieh.
