Shillong, Naitung 21
Ka jingïakhun ban ïoh ïa ka tiket na ka BJP ban ïa aireng ha ka ilekshon shiteng samoi jong ka Shillong Parliamentary Konstitwensi ka la nang khluit, ha kaba ki la don palat 9 ngut kiba ki la aiti ïa ki aplikeshon sha ka State Unit jong ka seng.
U MLA ka Pynthorumkhrah uba dei ruh u nongïalam ba rangbah ka BJP, u Bah A.L. Hek ha ka Sngi Ba-ar u la ong ba ïa baroh ki aplikeshon la phah sha ki nongïalam ba halor jong ka seng da u State President.
Hynrei u Bah Hek u la kdew ba ka rai haba ïadei bad kane ka lah ban shim por namarba ki nongïalam ba halor ki dang bunkam ha ka jingpynbeit thymmai ïa ki kam hapoh ka seng.
“Ïa ki nongkitkam ba halor bad ki ‘Executive’ yn dang hap ban pynbeit. Ki don shibun ki kam kiba kyrkieh. Kin sa rai halor ka Shillong ha ka por kaba biang,” u la ong haba ïakren bad ki nongthoh khubor.
Kumba ka long mynta, ka seng ka dang ap ïa ki jingbthah na Delhi halor u kyrtong ban ïakhun ïa ka ilekshon shiteng samoi ban wan.
