Shillong, Naitung 21
Ki paidbah jong kawei ka shnong ha Bangalore ki la lap ïa ka phone jong u samla Khasi uba jah lynti ha Bangalore namar ki la beh ïa u haba u wan tied ïing ha ka por shiteng synñia.
Une u samla Khasi u dei uba kyrteng u Kwis Sumer uba dang 23 snem ka rta uba na shnong Muktapur, West Jaiñtia Hills haba u la jah ha Bangalore ha ka 13 tarik mynta u bnai bad haduh mynta ka 21 tarik Nai-tung ym pat lap dien ïa u.
Haba buddien biang ïa ka jingjah une u samla ha Bangalore la ïoh ban ïakren biang bad u President ka KSU Bangalore Unit u samla Donboklang Nongphut uba la ïathuh haba u la kylli pyrthew bha ïa ki pulit ha Bangalore ki la ïathuh ba ïa ka phone la wan aiti da ki paidbah ha ka 14 tarik mynta u bnai hadien ba ki la ïoh tam na madan.
U la ïathuh ba ka jingïoh tam ki paidbah ïa ka phone ha madan ka dei haba ki beh ïa u namar u wan tied ïing ha ka por 12 baje shiteng miet, kumta kita ki trai ïing haba ki la ïoh sngew ïa kata ka jingwan tied ïing ki la pyrta bad haba la mih bun ngut, une u samla Khasi u la mareh kulmar.
“Haba u Kwis u la mareh kulmar, ki paidbah kim lap shuh namar ba ka dei ha ka por mynmiet hynrei la ïoh tam ïa ka phone bad ki la leit aiti ha ki pulit,” u la pyntip.
Shuh shuh u la pyntip ba une u samla u la dep shong ïa ka rel kaba mih na Bangalore ha ka por 9:00 baje mynmiet ban leit trei bad uwei u para shnong uba kyrteng u Sanu Lamare uba la don lypa ha kawei ka jaka kaba jngai kumba 9 kynta eiei hynrei ym tip na kaei ka daw ba um shym la poi ha jaka ban hiar hynrei u la ïaid kulmar ban poi ha kawei ka shnong haduh ban leit tied ïing jong ki briew ki bym ithuh haduh ba un shah beh ha ki paidbah.
U la ïathuh ba ki bahaïing hasem bad ki nongïalam shnong Muktapur kin sa phah briew ban leit sha Bangalore ban wad lang ïa une u samla uba la jah naduh ka 13 tarik mynta u bnai.
U la pyntip ba une u samla na Muktapur u dei uba la wan bylla teng kham mynshwa ha Tamil Nadu u la kham tip ïa ka leit ka wan haba u shong rel hynrei um tip na kaei ka daw ba u jah lynti haba u wan sha Bangalore.
Kumban shu pynkynmaw na ka liang ka kmie jong u Kwis ha ka 15 tarik mynta u bnai ka la leit ujor da ka ejahar sha ki pulit ka Muktapur Police Patrol Post ban pyntip ba u khun u la jah ha Bangalore naduh ka 13 tarik mynta hi u bnai.
