Shillong, Naitung 21
U Myntri Rangbah ka Jylla Conrad K Sangma ha ka sngi Ba-ar u la pynïaid ïa ka jingïalang lyngba ka durkhih bad u Myntri ba dei khmih ïa ka tnad General Administration Department (GAD) bad ki heh ophisar ka tnad ban ïa bishar halor ka jingïaid ki projek jingtei kiba dang ïaid bad ba dang tyrwa, kiba ïadei bad ki Meghalaya House ha kylleng ka Ri.
Ka jingïalang kala bishar bniah ïa kaei kaba long ba man jong ki jingtei kiba dang ïaid bad ki jingtei pynheh, ka jingpyntrei ïa ki Meghalaya House ba thymmai bad ka jingtreikam jong ki jingtei kiba la don lypa. Ka jingïalang kala ïakren shaphang ki projek ha Delhi, Noida, Mumbai, Bengaluru, Vellore bad Kolkata, haba pynleit jingmut ïa ka jingpynbha ïa ki jingtei, ka jingai jingshakri bad ka rukom pynïaid kaba thikna.
U Myntri Rangbah u la bishar ïa ka jingïaid ki kam jong kawei pa kawei ka projek, khmih bniah ïa ka por ba la buh ban pyntrei ïa ki kam, bad bthah ïa ki ophisar ba kin pynthikna ba kin pyntrei ha ka por kaba biang haba pynneh ruh ïa ka jingtrei bha ïa ka kam. U la ban jur ïa ka jingdonkam ka rukom pyrkhat (planning) kaba paka khnang ba kine ki jingtei kin lah ban pynbiang ïa ka jingdonkam ba nang bun jong ki nongshong shnong ka Meghalaya kiba leit shabar ka Jylla.
Ha kane ka jingïalang, ka jingïakren kala long eh halor ka jingpynkhlaiñ ïa ka rukom pynïaid bad jingtreikam jong ki Meghalaya House khnang ban pynthikna ïa ka jingshakri ba kham bha na ka bynta ki samla pule, ki nongpang kiba leit wad jingsumar, ki nongtrei ka Sorkar bad kiwei-kiwei ki nongshong shnong.
U Myntri Rangbah u la ban jur ïa ka jingkongsan ban pynneh ïa kine ki jingtei kum ki jingtei kiba pdiang bad ba pynïaid bha, kiba shakri kum ki ïing ba shabar ka Jylla na ka bynta ki nongshong shnong ka Meghalaya.
U la bthah ruh ïa ka tnad ba kan ïai bteng ban peitthuh bha ïa ka rukom pyntreikam ïa ki projek bad ban pyntrei kloi ïa ki kam ba dang sah khnang ba kine ki jingtei ba la tyrwa, kin lah ban dep noh hapoh ka por kaba la buh.
