Shillong, Naitung 21
Ka Khasi Student’s Union Laskeiñ Circle ha ka sngi Ba-ar jong ka taïew, ki la leit ban ïakynduh ïa u Director of School Education and Literacy, ban pan jingshai halor ka jingdon ka jingthung kam nonghikai ha ka sobjek History ha ka skul Sawlyngdoh Higher Secondary School.
Haba kren sha ki lad pathai khubor u Bah Leningrad Tariang, President KSU Laskeiñ Circle hadien ba ki la dep ban ïakynduh ïa u Director, u la ïathuh ba ka Sawlyngdoh Higher Secondary School, ka la pynbna lait kam ha ka sobjek History bad ha ka 15 tarik u Nohprah 2025, ki la pynlong ïa ka Interview, hynrei kaba phylla pat ka long, ba hadien ka Interview kim shym la pynmih ïa ka risol, hynrei la shu khot kyrpang ïa i wei i kyrtong ba thep kam bad kaba sngewphylla shuh shuh ba ita i kyrtong iba ki jied i khlem kot ïa ka percentage ba la buh haba ki khot ïa ka interview.
U la ong ba hadien kumba shiteng snem kala don ka ujor sha ka seng bad haba ki la tohkit bha ki la lap ba ka la don ka jingbym khuid haba ki jied ïa kane ka kam nonghikai. Na ka liang ka seng, kaba peit ïa ka pule puthi ha ka Jylla, kam lah ban shu sngap ka la leit ban ïakynduh ïa u Director ban pan jingshai halor kane.
U la ïathuh ruh ba na ka liang u Director u la tip, haba ïadei bad kane ka kam bad kular ban shim khia mar-mar ïa kane ka kam, namar kadei na ka bynta ka lawei jong ki samla pule kiba pule ha kane ka skul, ba kin ïoh ïa ka jinghikai kaba biang.
U la bynrap da kaba ong, ban jied ïa ki nonghikai ki bym biang ban hikai kan long ka jingduhnong kaba khraw. Na ka liang u Director u la kular ban shim khia ïa kane ka kam bad kidei ban jied da kiba dei hok ban ïoh bad lada kita kiba shah jied ruh lada kim wan ha ka por kaba biang, ki lah ban khot interview biang bad ban leh da kaba thymmai.
Namarkata, u la ong ba ka seng ka maham jur ïa ki briew kiba sngew donbor la ki dei ki politician ne kino kino kiba sngew ba ki lah ban thungkam bad thung da ki briew ki bym kot ban long ki nonghikai, ka seng kan ym ai lad satia bad kan sa ïai buddien ïa kane ka kam.
