Shillong, Naitung 22
U Myntri Rangbahduh Narendra Modi ha ka sngi Balang u la pynïaid ïa ka jingïalang bad ki Secretary ban bishar bniah ïa ka jingïaid shaphrang jong ka roi ka par ha ki jaka nongkyndong, ka rep ka riang, ka bha ka miat ha ka imlang sahlang bad ki kam ba ïadei bad kane na ka bynta ki thong jong ka Viksit Bharat, ha ïing sah jong u ha 7, Lok Kalyan Marg, Delhi.
U Modi u la ban jur ba ka bha ka miat jong ki nongshong shnong ka dei ban don ha ka bynta pdeng jong baroh ki jingpynkylla. U la ong ba ki jingpynkylla kiba ïadei bad ki jingdonkam jong ki briew ki dei ban ïaid shakhmat bad ban wanrah ïa ka jingkylla kaba don jingmut. U la ban jur ba ka jingthmu jong ki jingpynkylla kam dei tang ban kyntiew ïa ka jingtreikam jong ka Sorkar, hynrei ban pynkloi ïa ka jingïaid lynti jong ka India ban long ka ri kaba la kiew shaphrang.
U Modi u la ban jur ba ki rukom synshar ki sakhi ïa ki jingkylla kiba stet bad u la ban jur halor ka jingdonkam ban pynïahap bad pynkhlaiñ ïa ki rukom treikam jong ka Sorkar khnang ban pynbiang ïa ki jingdonkam jong ka jinglong jingman kaba kylla sted mynta. U la ai jingmut ban don ka jingpeit bniah ïa ki jingdonkam kiba dang mih ha kylleng ki tnad Sorkar Pdeng bad ki tnad bapher-bapher.
U Myntri Rangbahduh u la ban jur ïa ka jingdonkam jong ka rukom treikam jong baroh kawei ka Sorkar ban pynurlong ïa ki thong jong ka roi ka par jong ka ri. U la ban jur shuh-shuh ba ka jingangnud ban tei ïa ka Viksit Bharat ka dei ban long kum ka Jan Andolan bad ba ki samla jong ka ri India ki dei ban long ka nongrim jong kane ka jingthmu.
U la ban jur ïa ka jingdonkam ban ïaleh pyrshah ïa ka jingeh kaba khraw jong ka jingdih drok hapdeng ki samla. U la ai jingmut ba dei ban don ki sienjam ban weng ïa ka jingtrei marwei jong ki tnad Sorkar bad ban wanrah ïa ka jingïatreilang kaba kham khlaiñ hapdeng jong ki na ka bynta ki sienjam kiba ïadei bad ki samla.
U Myntri Rangbahduh u la kren shaphang ka jingpdiang paidbah ïa ki sienjam kum ka skhim PM KUSUM da ki nongrep ka lah ban wanrah ïa ki jingkylla ha ka kam rep kam riang. U la ban jur shuh shuh ïa ka jingdonkam ban peit bniah ïa ki sap ban pynthikna ïa ka jingïahap bad ki lad kiba mih ha kaba ïadei bad kiwei-kiwei ki ri bad ki jingdonkam ha ki por ban wan.
Ki Secretary ki la ïasam ïa ki jingshem bad ki jingsngew jong ki halor ki sienjam bad ki jingeh bapher-bapher ha la ki jong ki jong ki bynta. U Myntri Rangbahduh u la ïasam ïa ki jingai jingmut bad ka jingthmu jong u na ka bynta ka rukom treikam ha ki por ban wan. Ki la don ki jingïamir jingmut kiba seisoh bha ha kane ka jingïalang ha kaba ïadei bad ki kam bapher-bapher, kiba pynleit jingmut ha ka jingpyntreikam kaba paka, ka jingïasoh kaba kham bha bad ka jingpynstet ban pynurlong ïa ki thong Viksit Bharat.
Ha kane ka jingïalang la ïadonlang u Cabinet Secretary, ki Secretary jong ki tnad Sorkar Pdeng kumjuh ruh ki heh ophisar na ka ophis u Myntri Rangbahduh ka ri.
