Shillong, Naitung 22
Ka Hynñiewtrep Integrated Territorial Organization (HITO) Central Body ha ka 22 tarik Naitung, ka la pynkha ïa shnat treikam ka HITO Hyderabad Unit, kaba don haduh 80 ngut ki dkhot kynthup ki nongïalam.
Kane ka shnat treikam ka HITO Hyderabad Unit ka don ïa ka jingthmu ban shakri ïa ki khun Hynñiewtrep kiba sah trei bad pule ha Jylla Hyderabad bad ki thaiñ ba marjan.
Ïa ka jingïalang pynskhem ïa ki nongkitkam la wan ban pynlong da ki nongïalam ka HITO na Shillong kiba kynthup ïa u President Rangbah Bah Donbok Dkhar, u Political-cum Finance Secretary Bah Gary S. Myrboh, Bah Deibormi Rymbai (CEC Leader) bad Bah Risingstar Marweiñ, Secretary ka HITO Southern Border Area.
Ha kane ka sngi, u President Rangbah Bah Donbok Dkhar u la pynskhem ïa ki nongkitkam jong ka HITO Hyderabad Unit bad ai ruh ïa ka jingkren ba kyrpang ha kaba u la ong ba ka jingthmu jong ka HITO Hyderabad Unit ka long ban ai jingïarap ïa ki para Hynñiewtrep kiba don hapoh u pud u sam jong ka Hyderabad, khamtam ïa ki samla pule bad kiba trei kiba ju mad ïa ki jingeh haba ki don shabar ka Bri u Hynñiewtrep.
U la ong ruh ba ka HITO Hyderabad Unit kan trei ban peitngor ïa ka bha ka miat jong ki para Hynñiewtrep, ban ïada ïa ka hok jong ki bad ban pynïatylli ïa baroh ki jaidbynriew Hynñiewtrep, kiba kynthup ïa Khynriam, Pnar, Bhoi, War, Maram, Lyngam bad Diko, khnang ba kin im ha ka jingïatylli bad jingïarap lang.
Ki Nongkitkam jong ka HITO Hyderabad Unit ki long u Bah Stephan Lamin kum u President, u Bah Marba Sawian kum u Secretary, Percy Rynjah kum Organising Secretary, u Bah Aibanjop Lyngdoh kum u Finance Secretary, u Bah Batngen Diengdoh kum u Sports Secretary, ka Kong Avita Marbaniang kum ka Cultural Secretary bad ka Kong Steffy Marbaniang kum ka Adviser.
Ka HITO Seng kmie ka kitbok kitrwiang ïa ki nongkitkam ba thymmai bad ka kyrmen skhem ba kin trei shitom, trei hok bad aiti lut na ka bynta ka bha ka miat jong ki para Hynñiewtrep kiba don ha Hyderabad bad ki thaiñ ba marjan.
