Shillong, Naitung 22
Ka Khasi Students’ Union (KSU) kala thoh sha u Director ka National Institute Technology (NIT) Meghalaya, ban dawa ban wengnoh mardor ïa ki katto katne ki kyndon ha ka ‘Declaration bad Undertaking Form’ haba kynnoh ba kane ka pynkheiñ ïa ka hok tynrai jong ki samla pule.
Ha ka shithi, ka Seng kala pynpaw ïa ka jingsngewkhia halor ki kyndon bala pynlong kongsan ha ka jingpynrung klas bad jingpynbteng ïa ki jingpule kaba ka ong, “ka jingbuh kyndon ba khlem nongrim bad ka bym ïaid katkum ka riti synshar ka ri”.
Ka KSU kala pyrshah ïa ka kyndon 4 jong ka Declaration kaba buh ba ki samla pule ki hap ban kot 100 % ka attendance ne shong klas bad aibor ïa ka Institute ban shim ïa ki jingpynshitom lada duna.
Ka seng kala ïasaid ruh ba watla ka jinglong ryntih ha ka jingpule ka long kaba kongsan, ka jingbuh kyndon ïa ka jingshong klas ka bym lah ban pynjynsur, ka bym ailad haba pang ba shitom, haba ïap, leh internship, leh research lane ïashimbynta ha ki prokram ba ïadei bad ka pule puthi kam long satia kaba leh hok bad bym shah liang.
Ka KSU kala pynpaw ruh ïa kiwei ki kyndon kiba buh ba ki samla pule ki dei ban pynbna ba kim dei ban ïashimbynta ha kino-kino ki jingïakhih lane leit ïasoh bad kino-kino ki seng ne kynhun, haba maham ba ïa ka jingrung klas lane jinglong samla pule lah ban pynduh noh lada pynkheiñ. Ka KSU kala pynpaw ba kane ka dei ka jingpynkheiñ beit-beit ïa ka hok ba la pynkup hapoh ka Article 19(1)(a), 19(1)(b) bad 19(1)(c) jong ka riti synshar, kaba ïada ïa ka hok ban kren bad pynpaw, ka jingïalum paidbah ba jai jai, bad ka hok ban thaw ïa ki seng ne kynhun.
Ka KSU kala dawa ïa ka NIT Meghalaya ba kan weng noh ïa ka kyndon shong klas ba 100% bad bujli da ka polisi kaba don jingmut kaba pynlait noh ïa ki khep kiba dei hok. Kala dawa ruh ba dei ban weng noh ïa ka kyndon ba khang ban leit rung lane thaw ïa ki seng ne kynhun bad ban pynshai ba tang ki kam ba long beaiñ, kam thombor lane ki kam ba pynthut ki dei ban ngat ha ki jingpynshitom, ym ka jingïakhih kaba jai jai.
