Shillong, Naitung 22
Ka ‘Estimate Committee’ jong ka Ïingdorbar Thawaiñ ka Jylla ha ka Sngi Balang ka la pynlong ïa ka jingjurip ïa ki 3 tylli ki projek ba kongsan kiba dang ïaid shakhmat ha ka Jylla – ka Pohkseh Water Supply Scheme, ka New Shillong Water Supply Scheme ha Mawpdang, bad ka IT Park Building kaba 2 ha Shillong Technology Campus.
Ïa kane ka jingleit jurip la ïalam da u Chairman ka ‘Estimate Committee’, u Bah Mayralborn Syiem, ha ryngkat ka jingdon lang ki dkhot ka komiti, ka Miani D. Shira, Bah Renikton Lyngdoh Tong-khar bad u Remington G. Momin.
Ha kane ka sngi, la synran lang ruh da ki ophisar na Assembly Secretariat, ka tnad Public Health Enginee-ring (PHE) bad ka tnad Information Technology.
Ha Pohkseh, ka komiti ka la khmih bniah ïa ka jinglong-jingman jong ka projek sam um. U Bah Syiem u la ong ba ka rukom tan um ha katei ka jaka kaba la don lypa ka la sniew noh katto-katne snem mynshwa bad ïa katei ka mat la wanrah kham hashuwa sha ka jingtip jong ka komiti.
“Ka jingjia ka long kaba sngewsih. Kam dei ka jingbakla jongno-jongno ruh. Ngi la bthah ïa ka tnad ban wad ïa ka jaka kaba thymmai na ka bynta katei ka skhim,” u la ong.
U la pynpaw ka jingkyrmen ba ka tnad PHE shen kan sa pynkhreh ïa ki jingbuh jingkheiñ ba la pynkylla.
U Bah Syiem u la ai khublei ruh ïa ka Dorbar Shnong Pohkseh kaba la ai jaka na ka bynta katei ka projek, bad ong ba lah ban sdang noh ïa ki kam ynda la dep pynbeit ïa ka jaka kaba thymmai ban pyntikna ïa ka umbam-umdih kaba khuid na ka bynta ki longïing ha katei ka thaiñ.
Hadien kane, ka komiti ka la leit jngoh ïa ka skhim sam um jong ka New Shillong ha Mawpdang. Na ka liang ophisar ka PHE ki la batai sha ki dkhot shaphang ki bynta kiba la don lypa, kynthup ïa ka ‘Treatment Plant’ bad ki jingtei kiba ïadei bad kane ka kam.
Haba khmih bniah ïa ka jingïaid shakhmat jong ka kam, u Bah Syiem u la ong ba ka jingpyntrei bad ka pisa kumjuh ha kaba ïadei bad kane projek ka long kaba sngewhun.
“Kane ka projek ka don ha ka lynti kaba dei. La pyntip sha ngi ba ïa ka ‘Phase 1’ – kaba kynthup ïa ka dam, ka ‘Main Gravity Line’ bad ka ‘Treatment Plant’ – yn sa pyntreikam bad pyndep ha u bnai Nohprah, 2027,” u la ong.
U la bynrap ba ka ‘Phase 2’ kan pynleit jingmut halor ka rukom sam um ban pynpoi um sha ki dong bapher-bapher ha New Shillong, bad pynpaw ka jingkyrmen skhem ba ïa kane ka projek yn sa pyndep ha ka por ba la buh.
Hadien kane pat, ka komiti ka la leit ban jurip sa ïa ka IT Park Building kaba 2 ha Shillong Technology Campus. U Bah Syiem u la ong ba ka komiti ka sngewhun ïa ka jingïaid shakhmat jong ka kam wat hapdeng ki jingeh ba ka tnad IT ka ïakynduh.
Baroh ar bynta ba ïadei bad ka jingpyntrei lem bad ka pisa-tyngka la shem ba ka long kaba sngewhun.
U la kdew ba ïa ka jingtei thymmai jong ka IT la khmih lynti ba kan thaw ïa ki lad ai kam ai jam na ka bynta ki samla ka Jylla bad ban kyrshan ïa ka jingroi jong ka tnad IT ha Meghalaya.
Ka ‘Estimate Committee’ ka la pynpaw biang ïa ka jingkular jong ka ban buddien bha ïa ki projek paidbah ba kongsan ban pyntikna ïa ka jingpyndep ha ka por kaba biang bad ka jingpyndonkam hok ïa ki jingdon-jingem na ka bynta ka jingmyntoi ki paidbah.
