Shillong, Naitung 22
Ka Education Cell jong ka Hynñiewtrep Youth Council ka la pyntip paidbah ba kan sa pynlong ïa ka jingïalang paidbah hakhmat khyrdop ka Assembly barim ha Khyndailad ha ka 23 tarik Naitung naduh ka por 4 baje janmiet.
Kane ka jingïalang paidbah ka long kum ka dak ban ai jingkyrshan ïa ka jingïakhih ki nongïalam jong ka Cockroach Janta Party (CJP) ha Nongbah Delhi kaba dawa ba u Dharmendra Pradhan, Myntri ka kam pule puti ka Ri un hiar shuki noh namar ka jinglait tuh ki jingkylli ka eksam NEET bad kiwei-kiwei.
Haba kren sha ki nongthoh khubor u Bah Enlang Sawian Secretary Education Cell ka HYC u la ong ba ka seng ka shim ïa kane ka rai ka dei namar ba ka Sorkar India ka kuman ïa ka jingdawa ba la dawa da ka CJP bad ki samla pule ki la shong ïakhih mynta la bun sngi ha Jantar Mantar, Delhi.
Shuh-shuh u Bah Enlang u la pynrem jur ïa ka jingleh ki pulit ha ka por ba ki pynpra ïa ki nongïakhih, da kaba u la kynnoh ba ki la bom bad tied lathi ïa ki samla pule kiba shimbynta ha kane ka jingïakhih.
U Bah Enlang u la ong ba ka seng ka sngewkhia ïa ka jinglait tuh ki jingkylli ka eksam NEET jan man la u snem bad kane ka jingïakhih ka CJP kam dei tang jong kano-kano ka Political Party, hynrei ka dei ka jong uwei pa uwei u samla pule ba ha ka Ri.
Kumta ka HYC ka la khot, la wer ïa ki kmie ki kpa ki khun samla, ki skul ki College ban wan ban ïashimbynta ha katei ka jingïalang bad ki lah ruh ban pynpaw ïa ki jingsngew bad ki jingai jingmut jong ki.
