Shillong, Naitung 22
U Myntri Sorkar bad MLA ka Jowai Bah Wailadmiki Shylla u la ther ïa ka Voice of the People Party (VPP), haba buh jingkylli ïa ka jinglah jong ka ban pynïaid ïa ka synshar khadar haba ai nuksa ïa kaei kaba jia ha KHADC bad kyntu ïa ki nongthep vote ba kim dei ban ngeit ïa ki jingkynthoh jong ka Liang Pyrshah kiba long pyrshah ïa ka Sorkar MDA ba ïalam da ka NPP.
Haba kren ha ka rynsan ïalap ilekshon MP shiteng samoi ka Shillong Lok Sabha na ka bynta u kyrtong ka NPP Dr. DRL Nonglait ba la pynlong ha Ummulong Madan Khawang ha ka miet sngi Ba-ar, u Bah Wailad u la ong ba ka VPP kala kheiñ poh ïa ki bor synshar nala tynrai hadien ba wanrah ïa ka Act hapoh KHADC bad hadien kala pyndam ïa ki kyndon kiba buh ïa ki Rangbah Shnong ban ai syrnod ïa ki jaka ha ki shnong ki thaw.
“Hato kane kam dei ka jingknieh noh ïa ka bor jong ki Rangbah Shnong jong ngi,” u la buh jingkylli.
U la kynnoh ba ki nongïalam ka VPP kila wan sha Jowai ban pynpaw ïa ka jingpyrshah ïa ki kam pynroi kiba la pyntrei hapoh ka Constituency, watla ma ki dalade kila pyni ba kim don satia ïa ka jingïatylli.
Haba kynthoh ïa ki 4 ngut ki MLA ka VPP, u Bah Wailad u la ong ba kane ka seng kam shym la lah ban wanrah ïa ka jingïatylli wat hapoh ka District Council.
“Kala don ha ka bor ha KHADC tang shisnem tam. U CEM u la iehnoh kam, u EM u la iehnoh kam. Hato kane ka dei ka ïing kaba im ha ka jingsuk bad jingïatylli?. Ki dang shu sdang ban synshar ha KHADC hynrei phi la ïohi hi dalade ïa ki kam ba kim shym la ïaid beit ïaid ryntih,” u la ong.
U la kdew ïa ka jingïakhih ba dang shen jong ka Hima Sohra bad ka jingkynnoh ba ki samla kiba kyrmen ban ïoh kam, kila shah beh kam pynban ha KHADC tang mar syn shimti ka VPP ïa ka bor synshar ha kane ka Council.
“Ka dang shu sdang ban shimti ïa ka jingsynshar ha KHADC hynrei kila mih pynban shibun ki kynrum kynram. Pyrkhat phi ïa kaei ka ban jia lada shisien ka por phi ai ka kabu ïa ki ba kin pynïaid ïa ka Jylla baroh kawei,” u la bynrap.
Hynrei u la ong ba peit sha ka NPP kaba don 32 ngut ki MLA, kala pyni ïa ka jingtylli bad kala kren tang da kawei ka sur.
“Phin nym ïoh sngew ïa u Symbud Myntri Rangbah Bah Sniawbhalang Dhar ban kren pher na kaei kaba kren u Bah Prestone Tynsong lane u Myntri Rangbah. Wat haduh mynta ngi dang dei ka ïing kaba im ha ka jingsuk bad ka jingïatylli,” u la pynpaw.
U Bah Wailad u la jubab ruh ïa ki jingkynnoh jong u President ka VPP halor ki kali jong ki MLA.
U ïathuh ba ma u, u la leit la wan da ka kali Sorkar ka Fortuner kaba don u nombor ML01, katba u President ka VPP watla um don satia ha ka Sorkar, u la pyndonkam da ka kali Fortuner shimet.
“Naba ïa nga, kum u Myntri Sorkar nga la ïoh ïa ka Fortuner ka Sorkar, hynrei ngi hap kylli nangno u President ka VPP u ïoh ïa ka Fortuner,” u la buh jingkylli.
