Shillong, Naitung 22
Ka State-BJP ha ka Sngi Balang ka la kiar ban kren eiei halor ki jingpynsngew kiba la saphriang ha ki rynsan ‘Social Media’, ha kaba u nongaiktien ka seng, u Arnab Das u la ong ba ka seng kam kyrshan ïa kiba kum kitei ki jingkynnoh bad ba ki long ruh kiba “lamler”.
U Das u la ong ba ka seng ka la wad jingtip na u President ka Yuva Morcha jong ka, uba la kyntait ba u la pynmih ïa ki jingkynthoh.
U la maham haba ïadei bad ka jingpdiang ïa ki jingthoh kiba saphriang ba la buh ha ‘Social Media’, da kaba kdew ïa ki jingjia kiba la dep ha kaba ka la don la jingleh tuh ne ‘Hack’ ïa ki ‘Account’ jong ki nongïalam ka Jylla.
“Ki kyrwoh jong ka seng ki ju wan lyngba ki lad kiba biang. Ngi kyntait jur ïa kino-kino ki jingkren bym don jingkitkhlieh kiba la kynnoh ba ki dei jong ngi,” la ong u Das.
Ka BJP Meghalaya ka la ong ba ka burom ïa ka hok jong ki samla pule ban ïakhih ha Jantar Mantar halor ka mat ba ïadei bad ka NEET. Hynrei ka la kynnoh ïa kiwei pat ki seng kiba pyrshang ban “pynkylla politik bad ban shim kabu” ïa ka jingïakhih.
Ka seng ka la pynrem ruh ïa ki jingshah thombor jong ki pulit ha ki por ba pynlong ki jingïakhih bad kyntu ïa ki samla pule ba kim dei ban ailad ïa ki kynhun pyrshah ban pyndonkam bakla bad shim kabu ïa ka jinglong-jingman.
U Das u la kynthoh shuh-shuh ïa ka Congress halor ka jingpyrshang jong ka ban rung shapoh ka ïingsah jong u Myntri Rangbahduh ka Ri, da kaba ong ba ka dei ka jingpynkheiñ kaba buh jingkylli halor ka jingshngaiñ jong u Myntri Rangbahduh.
U la kdew ruh ïa ka jingïapher jingmut kaba paw hapdeng ka AAP bad ka Congress halor mano ba ïalam ïa ka jingïakhih.
“Ka BJP kam kyrshan ïa ki kam thombor la ki long ha kano-kano ka dur. Ngi kwah ba ki jingïakhih kin long kiba jai-jai,” u la ong.
Halor ka jinglait tuh ki jingkylli jong ka NEET, u Das u la ong ba ka Sorkar Pdeng ka la dep ban kem ïa 13 ngut bad u Myntri Rangbahduh u la pyntikna ban wanrah ïa ki jingpynkylla kiba khraw.
“Da kaba kheiñ ïa ka jingheh bad jingïar jong ka India bad ka jinglong-jingman jong ka, kum kine ki jingkylla ki shim por. U Myntri Rangbahduh u shimkhia pura ban pyntikna ïa ka lawei jong ki samla pule jong ngi lyngba ki jingpynkylla kiba neh ha ka pule-puthi,” u la bynrap.
