Shillong, Naitung 22
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Pulak Jyoti Roy u la ai ka jingujor ba ha ka 18 tarik mynta u bnai, ki runar bym lah ban ithuh, ki la tuh ïa ka laptop jong u, ar tylli ki mobile phone, kawei ka Nikkon camera bad kawei ka identity card jong ka ophis na ka kali jong u, kaba don ïa u registration number AS01-DN-5669 kaba la pynïeng ha Police Bazar, Shillong.
Ka Kong Phaini Kharjana ka la ai ka jingujor ba ha ka 18 tarik mynta u bnai, ki runar bym lah ban ithuh, ki la tuh ïa ki ar tylli ki masi na ka sem masi jong ka, kaba don ha shnong Mylliem, Madan Ïing Syiem (East Khasi Hills).
Ha kawei pat ka khubor, u Wandonbok Pdahkasiej u la ai ka jingujor ba ha ka 19 tarik mynta u bnai, ha ka por kumba 2 baje mynsngi, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-2825 na ka jaka sah ka jong u, kaba don ha Jaiaw Lumbatemon, Shillong.
Katba na ka liang jong u Remarkable Najiar na Nongrimbah Block-V, Shillong u la ai ka jingujor ha ka 18 tarik mynta u bnai ba ki runar bym lah ban ithuh, ki la tuh ïa ka pisa kaba long haduh T.6.5 lak na ka kali jong u, kaba don ïa u registration number ML05-AB-7619.
Ha kawei pat ka khubor, u Ranjit Baruah u la ai ka jingujor ba ha ka 14 tarik mynta u bnai, ki runar bym lah ban ithuh, ki la prong tuh hapoh ka ïingsah jong u, kaba don ha Kench’s Trace, Laban, Shillong bad ban tuh ïa ka ksiar bad ka pisa kaba long T.70 hajar. La ong ba ki mar ba shah tuh ki dei kiba shongdor kumba T.2 lak.
Ha kawei pat ka khubor, ha ka 18 tarik mynta u bnai, ki pulit ka Assam ki la bat noh ïa kawei ka arshaka kaba don ïa u registration number ML14-1198 ryngkat bad uwei u briew u Salam Ali uba na Kukuria Pt-II, Assam. Kham hadien ki pulit ki la kem noh ïa une u briew.
