Nongstoiñ, Naitung 22
Ka jingsyier ka la wan biang ha ki nongshong shnong ka Langpih bad ki shnong ba marjan ha West Khasi Hills hadien ba ki nongshong shnong ki la kynnoh ba ki pulit ka Assam ki la wan rung khah-khah ha ki jaka ba don ka jingïakajia khlem da pyntip sha ki bor ba dei khmih jong ka Meghalaya.
Ha ka sngi Balang ki katto katne ngut ki nongshong shnong ka thaiñ Langpih hapoh ka jing-ïalam u Bah Trandinglan Nonglang, Sordar ka shnong Mawsikar kaba dei kawei na ki shnong ha ka thaiñ Langpih kaba don ruh ha khappud bad ka Jylla Meghalaya bad Assam ki la leit ban ïakynduh bad aiti ïa ka jingthoh sha ka Deputy Commissioner ka West Khasi Hills District ka Hema Nayak ha kaba ïadei bad ki katto katne ki mat halor ka jingwan khah-khah ki pulit ka Assam ïa kaba la kam ba kala pynmih ïa ka jingtieng jingsyier ïa ki nongshong shnong.
Katkum ka jingthoh ba la aiti sha ka DC, kaba la soi da u Bah Jylliew Singh Marwein uwei na ki nongshong shnong ka Mawsikar bad u Bah Trandinglan Nonglang, Sordar ka shnong Mawsikar la kam ba ka jingwan khah-khah ki pulit ka Assam kala pynmih ïa ka jingtieng jingsyier ïa ki nongshong shnong, bad kala long ruh ka jingpynkheiñ ïa ka jingïateh soskular hapdeng ki ar tylli ki Sorkar Jylla.
Nangta, la pynkynmaw ruh ïa ka jingjia siat kuli ha Langpih ha u snem 2010, ha kaba saw ngut ki briew kila duh noh ïa la ka jong ka jingim hadien ba la kynnoh ba ki pulit Assam ki la siat kuli, bad la kam ruh ba katei ka jingjia ka dang ïai bteng ban ktah ïa ki nongshong shnong, kiba dang tieng ïa ki jingïakynduh kiba kum kine.
Shuh shuh kala pynpaw ruh da kaba kam ba ki pulit ka Assam ki la rung sha ki shnong kiba don ha katei ka thaiñ ba don ka jingïakajia pud ha ka 15 tarik bad 20 tarik u Naitung, 2026, khlem da pyntip lypa sha ki bor shnong.
Nangta, la ong ruh ba ka jingwan jong ki pulit Assam ka long ban kylli jingkylli bad tohkit ïa ki nongshong shnong, kaba la wanrah ïa ka jingtieng bad jingsngewkhia ïa ki nongshong shnong.
Ha katei ka jingthoh la kdew ruh ba ka jingrung khlem jingbit bunsien ka lah ban pynjur ïa ka jingïakajia bad pynthud ïa ka jingsuk namar ba ki nongshong shnong ki im hapoh ka jingtieng kaba man ka por, bad ki jingjia kiba bteng ki lah ban pynmih ïa ka jingpyrshah jong ki paidbah lada ym shimkhia mardor da baroh ar tylli ki Sorkar Jylla.
Shuh shuh la kyntu ruh ïa ka Deputy Commissioner ba kan tuklar mardor bad ban rah ïa kane ka kam sha ka Sorkar Assam bad Meghalaya, bad la kyrpad ruh ïa ki bor pynïaid district ban bthah ba ki pulit Assam kim dei ban rung sha ki shnong ka thaiñ Langpih bad ki shnong ba marjan khlem da pyntip lypa bad ïatreilang bad ki bor pynïaid District bad ki nongsynshar shnong.
Khatduh eh ka mat ïa kaba la pynpaw ha katei ka jingthoh, ka long ban phah tohkit halor ki jingwan ki pulit Assam sha Mawsikar ha ka 15 tarik bad 20 tarik u Naitung 2026, ryngkat bad ki lad ki lynti kiba biang ban khanglad ïa kino-kino ki jingpynthut.
U Bah Trandinglan Nonglang, Sordar ka shnong Mawsikar haba kren ha ki nongthoh khubor u la ong, “Balei ngi hap wan aiti ïa kane ka jingthoh ban kyrpad ha ka Deputy Commissioner ka long ba lada jia kano-kano ka jingïatyngkhuh ha ka jingbym ïa sngewtynnad ka wanrah ka jingsngewsih ïa ka imlang sahlang bad ïa ka thaiñ hi baroh kawei”. U la ong ruh ba na ka liang jong ki paidbah kim pdiang ïa ki kam pynroi na Assam bad na ka liang jong ka Assam ka ïaleh kumno ban wan tur ban wan shna surok dei na kata ka daw ki paidbah kim kwah ïa kata ban wanrah ïa ki kam pynroi na Assam.
U Bah Trandinglan u la kam ruh ba ki pulit Assam ki bym dei na Langpih lane na Mawsikar ki wan ki kem ïa ki briew, ki shoh khlem daw khlem da tip ïa kano-kano bad kane ka buh jingma ïa ki paidbah. U la ong ruh ba ha ka jingïakynduh bad ka DC, kala kren shai ba kan sa phah sha ki bor bahalor ban ïa pynbeit na ka bynta ka suk ka saiñ.
