Shillong, Naitung 22
U Bah Mayborn Lyngdoh uba dei u nonghikai bad uba dei ruh uba trei ha ki kam paidbah u la mih na Shillong ban leit sha Delhi ban ïashimbynta ha ka jingïakhih ki samla pule ha Jantan Mantar ha Delhi kaba la khot da ka Cockroach Janta Party.
Haba u Bah Mayborn u la poi sha Delhi u la leit sha Jantar Mantar ban ai jingkren da ka ktien Khasi kaba u la pyllait ha rynsan ‘Instagram’ jong u hi ban pynrem ïa ka Sorkar BJP bad ai jingkyrshan ïa ki samla pule kiba dang ïakhih ha Delhi.
Haba u ai jingkren ha katei ka jaka, u la ong kane ka jingïakhih jong ki samla pule kam dei na kano-kano ka seng saiñpyrthei hynrei ka dei ka jingkitkhlieh ban wanrah jingkylla ha ka pule puthi hapoh ka ri.
“Nga wan ban pynsngew na ka jylla Meghalaya ba ngi kyrshan ïa kane ka jingïakhih namar nga ïohi ba ki la don ki samla kiba leit hashwa ban pyrshah ïa kane ka jingleh donbor ka Sorkar BJP,” u la ong.
Kumta u la ong lada ki samla ki ïeng na bynta ka hok jong ki, kim dei shuh ban shah ïalam bakla na kawei ka por sha kawei ka por ha kine ki nongmihkhmat kiba la tymmen hynrei ka la dei ka por ba ki samla kin ïalam hi dalade ïalade. Katba uwei u samla Khasi uba la tip kyrteng u Ram Khrobormi Shyrmang u leit ïakhih sha Jantar Mantar ha nongbah Delhi u la pyntip ba ka seng ki samla pule ka Cockroach Janta Party ki la ïengskhem beit ha ka nongrim ba lada u Myntri Rangbahduh ka ri India u Narendra Modi um lah ban pynhiar shuki ïa u Dharmendra Pradhan kum u Myntri ka tnad pule puthi u dei ban hiar shuki noh ïalade.
U Ram Khrobormi u dei shnong trai na Jalaphet, kaba hap ha East Jaiñtia, u la mih na Guwahati da ka rel ha ka 17 tarik mynta u bnai bad u la poi sha Delhi ha ka 19 tarik da ka jingsynranlang ki hynmen bad para.
U la ïathuh ba ha ka 20 tarik kaba dei ka sngi ba ki samla pule ki thmu ban leit tur sha Parliament u la long u nongïarap ïa ki samla kiba mynsaw na ka jingshah bom lathi ha ki pulit.
U la ïathuh ba ki samla pule na kylleng ka ri India ki la poi ha Jantar Mantar kaba ki dang ïalum haduh mynta.
