Shillong, Naitung 23
Ka seng ki samla pule ka North-Eastern Hill University ha ka sngi Palei ka la mih paidbah ban ai jingkyrshan ïa ka jingïakhih u Sonam Wangchuk bad ki samla pule ba na kylleng ka ri India kiba ïakhih halor ka jinglait tuh ki jingkylli ka eksam NEET bad ban dawa ïa u Dharmendra Pradhan u Myntri ka tnat Pule Puthi ka Sorkar Pdeng ba u dei ban hiar shuki noh.
“Man la ki eksamin ba ïakop ka pyni ïa ki snem jong ka jingtrei shitom, ka jingbym ïohthiah miet, ka jingpynlut pisa bad ki jingangnud jong ki samla bym lah kheiñ, hynrei, haba ka rukom pynïaid ka pulom noh, dei ki samla pule kiba kynduh jingeh” ong ka kyrwoh khubor NEHUSU.
Ka North-Eastern Hill University Student’s Union (NEHUSU) ka la ong ba ka jinglait tuh ki jingkylli ka la pynduh jingshaniah ha ka rukom thoh eksamin ba long ha ka ri bad ka pynkhia jingmut jingpykhat ïa ki samla pule.
Ka NEHUSU ka la pynrem jur ruh ïa ki jingmih khubor ba ki bor pulit ki la pyndonkam da ka bor pyrshah ïa ka jingïakhih ba jai-jai jong ki samla pule. “Kaba sngew shyrkhei ka long ba ki samla pule kiba shisur shi dur ki shah bom shah tied katba ki dang pynlong ïa ka jingdawa ïa ka hok jong ki ban ïoh ïa ka jingbishar ba hok, ha ka ri Synshar Paidbah ki samla pule ki lah ban pynsngew, ym ban shu sngap jar” ong ka kyrwoh bad bynrap ba kum kine ki jingleh kim dei ban ïoh jaka ha ka ri ba la tei halor ka nongrim jong ka Riti Synshar.
Ka Union ka la buh jingkylli haduh katno ki samla pule kin dang hap ban kit ïa ki jingeh na ki jingbakla kiba khlem don ba shim ka jingkitkhlieh. Sa katno ngut ki samla pule kin dang hap ban siew ïa ka dor na ka bynta ki jingbakla kaba kim shym la leh?.
Ka NEHUSU ka la kyntu ïa u Myntri Pule Puthi jong ka Sorkar Pdeng u Dharmendra Pradhan ban shim ïa ka jingkitkhlieh ba un risaiñ noh na ka shuki.
“Ban wanrah biang ïa ka jingshaniah jong ki paidbah ha ka ri haba ïadei ka pule puthi kan sdang biang na ka jingkitkhlieh, ym da ki jingpynthikna,” la ong ka Union.
Shuh-shuh ka NEHUSU ka la pynpaw ba ki samla pule ki dawa ban don ka jingkhuid bad ka jingbishar ba hok ka dei ban don ha ki bor pynïaid jong ka tnad pule puthi. “Ngi ïeng skhem ha ryngkat u Sonam Wangchuk bad ba uwei pa uwei u samla pule u ba ïaleh na ka bynta ka pule puthi kaba bha, kaba ïada, kaba pynneh ïa ka jingkhuid, ka jingkitkhlieh kim dei ban kynrandien” ong ka kyrwoh.
