Shillong, Naitung 23
Ka Voice of the People Party (VPP) kaba dei ka seng saiñpyrthei kaba shong ha Liang Pyrshah ha Ïingdorbar Thawaiñ ka la mih shakhmat ban buh jingkylli ïa ka jingsngap jar ka Sorkar MDA halor ka jingïakhih ki samla pule ha Delhi tang namar ba ka ïatreilang bad ka Sorkar NDA ha Delhi.
Ka VPP ka la ai ruh ka jingkyrshan ïa ka jingïakhih kaba dang ïaid shakhmat ha Jantar Mantar halor ka jingkynnoh ba don ki jingleh bym suidñiew ha ka eksam NEET bad ka la kdew ruh ba ka Sorkar Meghalaya ka dei ban pynpaw ïa ka nongrim jong ka halor katei ka mat.
Katkum ka durkhih ba la pyllait, u nongaiktien ka VPP u Dr. Airpiece W. Rani u la ong ba ka seng ka ïeng ha ka jingïatylli bad ki samla pule bad ki nongshong shnong kiba ïakhih ha Delhi.
U la kynthoh ruh ïa ka jingleh jong ki pulit pyrshah ïa ki nongïakhih ha ka nongbah jong ka ri namar ki la mad ïa ka jingshah siat da ka um bad siat da ka lyer pynsat khmat bad tied da ki lathi bad ba don ruh kiba la shah sumar ha hospital namar ka jingmynsaw.
Nangta ka seng ka la pyntbit ïa ki suloi jong ka halor ba ka Sorkar Jylla kam shym la jubab ïa ki jingjia ha Delhi.
U Dr. Rani u la ong ba katto katne ngut ki samla na Meghalaya ki la ïashimbynta ha ka jingïakhih, bad ha kane ka por ba ki ïakynduh ïa ka jingshah lehbeiñ, ki paidbah ki khmih lynti ba u Myntri Rangbah ka Jylla bad ka Sorkar kin ai jingkren.
“Ha ka jaka kata, ka Sorkar Jylla ka la jied ban sngap jar. Hato kane ka mut ba ka Sorkar kam pyrkhat ïa ki samla bad ïa ka lawei jong ki? Hato ka mut ba ka Sorkar kam don jingsngewkhia ïa ki kam bymman ba la kynnoh? Lane ka Sorkar Meghalaya ka la kylla long kum ka ‘puppet’ ha ka kti jong ka Centre?” u la kylli.
U Dr. Rani u la kdew ruh ïa ka jingkren kaba dang shen uwei u nongïalam na kawei ka seng kaba ïatreilang bad ka kynhun synrop MDA, kaba u la ong ba dei ban siat ïa kiba ïakhih, hynrei um tip la kane ka jingkren ka dei kaba shisha ne em.
“Ki paidbah ka Meghalaya ki dei hok ban tip shano ka Sorkar Jylla ka ïeng halor kane ka mat. Ki jingkylli kiba ngi buh ki ktah ïa ki samla ka Jylla kumba ki ktah ïa ki samla sha kiwei pat ki jaka ha ka ri,” la ong u nongaiktien ka VPP.
