Shillong, Naitung 23
U Bah Roy Kupar Synrem, President ka Hynñiewtrep Youths Council (HYC), shi bynta ha ka jingkren jong u, u la pynpaw ka jingsngewdiaw halor ka jingduna palat ki samla trai Jylla, kiba wan ban shim bynta ha ka jingïalang kyrshan ïa ki samla ha Delhi halor ka jinglait tuh ki kot jingkylli eksam NEET.
U Bah Roy u la ong, ba ka long kaei-kaei kaba sngewsih ban ïohi ba ki samla kiba na kane ka Jylla kim pat sngewthuh halor ka jingeh kaba lah ban ktah, namar ka jingleh ka Sorkar India.
U la ong, ba kiba poi sha ka jingïalang kidei kiba na kiwei ki Jylla.
Kumta u la ong, ba kim dei ban kheiñ sting namar kane ka jingjia kam ktah tang ïa kiwei kiba na ri thor hynrei ïa ka ri baroh kawei bad ynda wanrah ka Sorkar India ïa ki polisi bapher-bapher, ha kata ka por kin wad jingïarap na ki sengbhalang, katba da don ka jingjia kaba ktah pat kim mih shakhmat ban kyrshan ne mih paidbah.
“Ka aiñ jong ka Sorkar India ka ktah ruh ïa u wei pa u wei u nongshong shnong ka Jylla Meghalaya. Dei halor kane ka nongrim ba ka HYC ka kwah ban don ha syndah bad ki khun samla kiba la ïakhih hapoh Delhi,” la ong u Bah Roy Kupar.
Haba kren ha ka jingïalang ba la pynlong ha Khyndailad, u Bah Roy Kupar u la ong ba kane ka jingwan jong ki paidbah sha kane ka jingïalang, ka long ka bor, bad wat lehkai bad ki samla ka ri, namar ka jingïakhih ki samla pule ha Delhi ka ktah ruh wat sha Meghalaya.
“Ngi ïa wan hangne, ym dei ban ïakhih, ym dei ban ïa lehkmen hynrei namar ka hok ban dawa. Ki samla jong ka ri, ngin pyni bad ngin ïathuh sha kine ki briew kiba don ha ka bor ïa ka jingïatylli,” u la ong.
U la ong ruh ba haba ïadei bad kane ka jinglait tuh ki jingkylli, mano ban shim ka jingkitkhlieh bad mano ban shim ka jingkitkhlieh lada jia ba kum kine ki jingjia kin wan. Ki don ki samla pule kiba la pynkhreh bha ïa ka exam haduh 2 ne 3 snem eiei, ban ïoh bun ki marks, hynrei tang ka na jinglait tuh ki jingkylli eksam, ka la pynkulmar lut ïa ki jingthmu ki samla pule.
Haba ïadei bad ka jingduna ki Samla na ka Jylla ba wan ha ka jingïalang, u Bah Roy Kupar u la ong, ba haba lait tuh ki jingkylli ha kino-kino ki bynta jong ki eksamin, hato kam ktah seh wat ïa ki samla ka Jylla bad lada wanrah ka jingkylla ha ka pule puthi, balei kan ktah tang ïa ki samla ba shong ha Delhi, Kolkata, Mumbai, hato kam ktah seh ha Shillong, Jowai, Nongstoiñ ruh?
“Nga kren da ka jingsngew kitkhlieh, nga kren da ka jingsngew dap ram ïa la ka jong ka Jylla. Ngan ong ba wat kheiñ sting ïa kum kine ki jingjia. Kine ki jingjia kim ktah tang ïa ki briew ba shong ha ri thor, hynrei ka ktah lang ïa ngi ruh kiba sah ha Meghalaya bad ki bahaïing ha sem jong ngi,” u la ong.
