Shillong, Naitung 23
U Bah Adelbert Nongrum, MLA ka North Shillong Konstitwensi ha ka janmiet jong ka sngi Palei, u la wan ban ai ka jingkyrshan ïa ka jing-ïakhih ki samla pule ban dawa hiar shuki noh ïa u Myntri ka tnad pule puthi ka Sorkar India, hadien ba la lait tuh ki jingkylli NEET.
Kane ka jingïakhih kadei kaba la pynlong da ka Hynñiewtrep Youth Council (HYC) ha Khyndailad Shillong, kum shibynta ban kyrshan lang ïa ki samla pule kiba la ïakhih ha Nongbah Delhi.
Haba kren sha ki lad pathai khubor u Bah Adelbert u la pynpaw ka jingkyrshan ïa ka jingïakhih ba la pynlong da ki samla pule ha Jantar Mantar, Delhi.
Lah ban kdew ba hadien ba lait tuh ki kot jingkylli eksamin NEET, ki samla pule kila pynlong ka jingïakhih ha kylleng ka ri India bad ka jingïakhih kaba heh kadei ha Jantar Mantar, New Delhi ha kaba kila dawa ruh ba u Myntri ka tnat Pule Puthi ka Sorkar Pdeng udei ban hiar shuki mardor, nalor ka jingdawa ban wanrah jingkylla haka rukom treikam ka tnat pule puthi jong ka ri baroh kawei.
U Bah Adelbert u ong “Nga wan hangne ym tang kum u MLA hynrei nga wan kum u riew paidbah ba don ka jingkitkhlieh ïa ka jinglong jingman, khamtam ïa ka mat ba ktah ïa ka lawei jong ki khun samla jong ngi, namar shisien ba ngim don shuh ka jingshaniah, hangno ngin don jingkyrmen”.
U Bah Adelbert u la ong ruh, ba u wan shim bynta ha ka jingïalang ban pynrem ïa kito kiba donkti ban pyllait tuh ïa ki kot jingkylli eksamin NEET bad dawa na ka Sorkar Pdeng, ban pynshitom da kaba tyngeh ïa kito kiba donkti.
“Nga wan ruh ha kane ka por ban pynpaw ïa ka jingpynrem kaba jur ïa kiba donkti ban pyllait tuh ïa ki kot jingkylli eksamin NEET. Nga dawa ba ki briew kiba donkti ha kane ka kam, kidei ban shim ïa ka jingkitkhlieh” u la ong.
Namarkata, u MLA ka North Shillong u pynrem jur ruh ïa ki pulit kiba la thom da ka bor, pyrshah ïa ki samla pule kiba dangïai bteng ka jingïakhih ha Jantar Mantar New Delhi. “Kane ka pynpaw ba kim pat ler ban leh ïa la ka kamram, nga pynrem ïa ki namar ki la ïuhroit ïa ka hok jong ki paidbah, ban ïakhih katkum ka hok synshar paidbah” u la bynrap.
