Shillong, Naitung 23
Ka jingbuddien ban lap ïa ki briew kiba ju donkti ban pynrung ïa ki briew na ki jaka bapher-bapher jong ka Ri India sha Bangladesh bad na Bangladesh sha India, ka la long kaba seisoh ha ka 21 tarik u Naitung, 2026 na ka jingïoh bat jong ki ar tylli ki sengbhalang ïa kawei ka kynhun katba ka dang leh ïa kane ka kam.
Kine ki ar seng ki kynthup ïa ka HYC Nongtrai Unit bad ka HNYF Nongtrai bad ka jingïoh bat kine ki ar seng, kadei ha ka por kumba 4 baje janmiet katba ka dang don ka jingpyrshang ban pynrung ïa kawei ka kynthei kaba la wanrah na Delhi bad ban pynpoi sha Bangladesh.
Na kane ka briew, la ïoh bat ha ka jingdon ki kot ki sla kum ka jingpynshisha ïa ka jinglong nongshong shnong jong ka, kaba la shong pat ha Assam.
Ka HYC bad ka HNYF ki la ïoh bat ïa kane ka kynhun kaba la donkti ha kiba bun ki kam ban kit briew na India sha Bangladesh bad na Bangladesh sha India.
Kane ka kynhun kadei kaba ïa donkti lang ki Khasi bad ki Bangladeshi bad ki da pyndonkam da ka kali private kaba don ïa u Registration Number ML 05 AD 1644 bad kadei kaba long trai da u nongshong shnong jong kawei ka shnong kaba don ha East Khasi Hills.
Ha ka jingtohkit jong kine ki ar seng, la lap ba ym tang ki kynthei, hynrei la ju pynrung ruh ïa ki khynnah sha Bangladesh.
Ha kaba ïadei pat bad katei ka kynthei, kine ki ar seng ki la aiti ha ki pulit ha katei ka sngi na ka bynta ba kin leh ïa kaba donkam.
