Shillong, Naitung 23
Kum shi bynta ban pynrem jur ïa ka jingleh donbor ki pulit ban bom ban tied ïa ki samla kiba don hapdeng ka jingïakhih ha Jantar Mantar, Delhi ha ka jingïalam ka Cockroach Janta Party (CJP), ki spah ngut ki paidbah nongshong shnong ki la mih ban pynlong ka jingïakhih kaba jai-jai ha Police Point Laitumkhrah, Shil-long.
Ha kane ka jingïakhih kaba la pynlong da ki riew paidbah, la wan ban ïa shimbynta naduh ki heprit, ki samla pule, ki longkmie, longkpa, ki nonghikai skul, kane ka jingïalang ka dei na ka bynta ki paidbah, ha kaba ki nongïashim bynta ki la rah ïa ki plakad kiba thoh bad pynrem ïa ka Sorkar bad ka jingleh donbor jong ki pulit.
Ki paidbah kiba don ha ka jingïakhih, haba ïakren ki la pynpaw ba ka jingthmu ka long ban pyni ba ki ïeng ryngkat bad ki samla pule ba ïakhih ha Delhi da kaba kynnoh ba kine ki samla pule ki la shah shoh bad shah siat bom pynsat khmat ha ki pulit.
Ki paidbah kiba rah ïa ki plakad kiba thoh ïa ki jingthoh bapher-bapher kiba ong “Baroh ki khmat ki phai sha Jantar Mantar”, “Phi donkam ban hiar shuki noh”, “Ka India jong ngi ka tuid ka snam ha ki surok”, “Ngi ïohi ïa phi, ngi ïeng ryngkat bad phi”, “Ki samla pule kim dei ki lehnoh. Ki pyndonkam ïa ka hok jong ka jingsynshar paidbah ban kylli jingkylli ïa ka Sorkar,” la ong u wei u nongïashim bynta ha ka jingïakhih.
Shuh-shuh ki paidbah ki la pynpaw ba ka jingshahshoh jong ki Samla bad ka jingshah pyndonkam da ki bom sat khmat, kam dei ka rukom ha ka synshar paidbah bad pynpaw ba ki ïai don ryngkat bad ki samla pule ha Delhi.
Kawei pat ka nongïakhih kaba la wan ryngkat bad ka kmie ki bahaïing hasem, ka la ong ba ki dang kynmaw ruh ïa ki samla pule kiba la shim ïa la ka jingim hadien ba lait tuh ki kot jingkylli eksamin NEET. “Ngi don hangne na ka bynta jong ki bad na ka bynta ki bahaïing hasem jong ki” ka la ong.
“Ka India ka dei ka ri kaba bun tam ki samla pule, ngi don ïa ka hok ban dawa. Kaba tied da ki lathi ka la wanrah ka jingmynsaw ïa bun ngut ki samla pule bad ki dang shah sumar ha hospital. Nga kyrmen ba kin ïoh ïa ka hok jong ki”.
Ki nongïakhih ki la dawa na ka Sorkar ban shim ïa ka jingkitkhlieh halor ka jinglait tuh ki kot jingkylli eksamin NEET bad ki la kyntu ba dei ban ailad ïa ki samla pule ban ïakhih khlem da tieng na ka jingshah thombor ha ki bor ka aiñ.
