Shillong, Naitung 23
Ka Khasi Students’ Union (KSU) Delhi Unit hapoh ka jingïalam ka samla Marbiang Khongwir kum ka President ki la leit ban ai jingkyrshan ïa ki samla pule kiba dang bteng ka jingïakhih ha Jantar Mantar ha Nongbah Delhi kaba dang bteng haduh mynta ka sngi ka 23 tarik Naitung 2026.
Kane ka jingïakhih ki samla ha Jantar Mantar ka dei kaba la ïalam da ka Cockroach Janta Party kaba la ïaid mynta la shi bnai kaba ki la dawa ban hiar shuki ïa u Myntri ba dei peit ïa ka pule puthi ka ri India u Dharmendra Pradhan.
Ka jingïoh mynsiem kine ki samla kiba ïakhih ka dei namar la ïohi ha rynsan media ka jingshah shoh shah bom lathi bad shah siat lyer satkhmat haba ki thmu ban leit tur sha Parliament.
Ka samla Marbiang Khongwir haba ai jingkren ha kane ka jaka ka la ong kumba ka KSU ka ïeng ha nongrim ka pule puthi kumta ki la wan ban ai jingkyrshan ïa kine ki samla kiba ïakhih mynta la shi bnai ha Jantar Mantar khnang ban wanrah ïa ka pule puthi kaba bha ha ka ri India.
Haba ïakren bad ka samla Marbiang lyngba ka phone, ka la ïathuh ba ki kynthei ki sngew shngaiñ bha lada poi ha jaka ïakhih namar ki shynrang ki burom namar ka thong jong ki ban pynbha ïa ka pule puthi.
Shuh shuh ka la pyntip ba na baroh kylleng ka ri India ki la poi lut kiba la sah la ka jong ka jaka hynrei kaba sngewtynnad ka dei namar ïa ka bam la don ba wan ai sngewbha.
Haba kylli la ki ïoh ïakynduh ne em ïa ki nongïalam ka CJP, ka la ïathuh ba kam shym la ïoh lad namar hap ïeng lain kumba shi kynta ban ïakynduh ïa ki hynrei ka la ïohi na jngai ba u Dipke uba dei u nongïalam ka CJP u ai jingkren ban pyntip ba ka jingïakhih ka dang bteng.
Ka la ïathuh ba mynhynnin ka miet kumba 1:00 shiteng synnia ka la don ka jingïakulmar hapdeng ki samla bad ki pulit haduh ba ki pulit ki la mynsaw.
Ka la ïathuh ruh ba ki pulit ha Delhi kim nym shah shuh ïa ki samla pule ban ïakhih ha Jantar Mantar namar ka la dei ka por ban pynkhreh ïa ka sngi laitluid hynrei ki samla ki la rai ban bteng beit lada u Dharmendra Pradhan um pat hiar shuki kum u Myntri ka tnad pule puthi.
