Nongstoiñ, Naitung 23
Watla ka Civil Hospital Nongstoiñ, ka dei kawei na ki jaka sumar kaba ai ka jingshakri mynta la phew snem ïa ki paidbah ka thaiñ Nongstoiñ bad ka District hi baroh kawei bad ym lah ban len ba bun kiei kiei ki la urlong haba phai dien sha kane ka jaka sumar bad hooid na kawei ka sngi sha kawei pat kala sdang kiew shisha ha kaba bun ki briew kila ïa beh ban phah sumar ha kane ka jaka sumar.
Haba ïakren halor ki katto katne ki bynta halor kane ka hospital, u President ka HYC West Khasi Hills, kaba dei kawei na ki seng kaba ïai pynkynmaw ïa kiba bun ki jingdonkam ban wanrah ha katei ka jaka sumar, u Bah Lumlang Kharsyiemlieh u la ong, “Phi lah ban pynkylla Myntri na uwei sha uwei hynrei kaei bala kular ïa ngi dei ban pynneh.”
U samla Lumlang u la ïathuh ba ka seng kala ïakynduh ïa ka Kong Ampareen Lyngdoh Myntri ka tnad ka koit ka khiah ha kito ki por kata ha ka 19 Jylliew, 2023 ha Shillong bad ka la wan jngoh ïa ki Hospital Nongstoiñ bad kiwei ki jaka sumar ne jaka treikam bad la pynlong ruh ka jingïalang ha DC haba la don lang naduh ki doktor, DC, kiwei ki tnad Sorkar halor ki jingdawa ka seng.
“Hooid ki don bun ki la urlong namar ngi peit ka Civil Hospital Nongstoiñ mynta kala sdang kiew shisha bun ki briew kila ïabeh ban sumar hangtei, hynrei kaba dang sah bad kaba kongsan ka jingdawa ka HYC West Khasi Hills District ka long ka Dialysis Centre namar bun bah kiba shitom khyllai na Rambrai, Maweit, Riangdo, Shallang bad kiwei ka eh bha, ki hap wan wai kali, baibam, bai sumar, ka jinglut ksan ka long haduh katta katta,” ong u samla Lumlang.
U la bynrap ruh ba halor kane ka bynta bad halor ka jingban jong ki jingkyrduh ki jingjynjar kumta ka HYC ka kyrpad ïa ka Sorkar ban ïarap ban pynurlong ïa kane ka jingdawa ba kongsan eh.
U la pynpaw ba ka HYC ka ngeit skhem ba watla ka Sorkar kala pynthymmai ïa ki Myntri Sorkar kynthup ha ka tnad ka koit ka khiah hynrei ki jingkular kim dei ban kylla ïa u paidbah.
