Ka jingïakhih jong ki samla pule hapoh ka Ri, kaba la lamkhmat da ka Cockroach Janta Party ka la pur mynta sha kylleng ki bynta jong ka ri bad kumjuh ruh wat sha kiwei ki ri jong ka pyrthei kiba la mih ban pynpaw ïa ka jingsngewlem halor ka jingshah tied shah bom jong ki samla. La ïohi ba kane ka jingïakhih jong ki samla ka la sdang ban jur bad heh hadien ba ka la don ka jingshah tied lathi jong ki samla kiba ïakhih ha Delhi, haba ki la thmu ban ïaid sha Parliament. Ha kane ka sngi ka la don ka jingshah tied lathi jong ki samla, ha kaba ki pulit ym tang ba ki la tied lathi hynrei ki la siat ruh da ki bom pynsat khmat ban pynpra ïa ki samla. Kane ka jingïakhih kaba la sdang na Jantar Mantar ha Delhi, mynta ka la pur sha ki kylleng ki Jylla, ha kaba ki samla ki la mih sha surok ban pynpaw ïa ka jingsngewkhia halor ka jinglong jingman bad jingshah tied jong ki samla ha Delhi.
Ka jingsdang jong ka jingïakhih, ka dei ba kum ki samla ki la dawa ban pynbeit noh ïa ka jingkynrum kynram ha ka pule puthi khamtam lei hadien ba ka la don ka jinglait tuh kaba khah khah jong ki jingkylli ka eksamin NEET. Ki samla ki la dawa ruh ba u Myntri ba khmih ïa ka tnad Pule Puthi ka Sorkar Pdeng u Dharmendra Pradhan u dei ban hiar shuki mardor. Ha kane ka jingïakhih jong ki samla pule, ngi la ïohi ba ym dei shuh tang ki samla kiba la mih shakhmat ban ïakhih da kaba jai jai hynrei la ïashim bynta bad snohkti ruh naduh kiba la san la rangbah kumjuh ruh ki khynnah kiba dang rit, da kaba kdew ba ki kwah ïa ka lawei kaba phyrnai. Kan nym don jingmut ba ngin shu shong ha ïing bad shu peit lada ngim ïashim bynta lang lada ngi sngewkhia shisha halor ka lawei kaba kumno ki khun ki kti jong ngi kin ïoh. Ka long shisha ka jingïakhih kaba kham pher namar ka dei kaba la lamkhmat da ki samla ym da kino-kino ki seng saiñpyrthei hynrei kumba ka ju long hi, ki don beit ki seng saiñpyrthei kiba ïaleh ban wan bad lamkhmat ïa kane ka jingïakhih. Hooid kam long satia kaba bakla ban ïashim bynta da mano-mano ruh, namar baroh-baroh ngi kwah ba baroh ki kam ki jam kin long kiba ïaid beit bad khamtam lei ba ka lawei jong ki khun ki kti kan long kaba shngaiñ. Ngi la ïohi sha ki Jylla rithor, kiba bun ki samla kiba la dkhat noh ïa la ka jingim tang namar ka jingsngewduh mynsiem haba mih ki kynrum kynram khamtam haba ïadei bad ka eksamin, kaba ki la pynlut ym tang ka bor, ka por ka jingtrei shitom baroh shi snem hynrei wat ka pisa ruh kumjuh.
Kaba kham pher na kiwei ka long ba kane ka jingïakhih jong ki samla ha Delhi ka la paw pyrthei kam da dei eh lyngba kita ki lad pathai khubor ne kiba ngi ong ki ‘National Media’ hynrei dei lyngba ki rynsan Social Media, kaba la lah ban pyntylli ïa kiba bun ha baroh kawei ka ri. Katkum ki durkhih ba la saphriang ha ki rynsan social media, la ïohi ba ki samla kiba ïakhih ha Jantar Mantar, kim shym la ailad satia ïa ki katto katne ki National Media ban lum khubor hynrei ban beh krad ïa ki, da kaba kynnoh ba ki dei kiba la don lypa ka jingshah liang sha ka Sorkar. Hooid ngi sngewthuh ba ki lad pathai khubor ki long shisha ki rishot ba donkam ha ka ban pynphriang ïa ki jingtip ne ki khubor kiba donkam bad ba ka dei ruh ka kamram jong ki lad pathai khubor ban buh jingkylli ïa ka Sorkar na ka por sha ka por. Kum ha kane ka jingïakhih pat la ïohi ba kita ki National Media, kim shym la lah satia ban buh jingkylli ïa ka Sorkar halor ki kynrum kynram kiba la mih bad kiba la ktah ym shuh tang ha Delhi hynrei ha ka ri baroh kawei.
