Shillong, Naitung 24
Ha ka jingïohsngew ïa ka jingud jingnam jong ki nongrep haba ïadei bad ka jinghiar dor palat u kubi, na ka liang u Bah Seiborlang Warbah, MDC ka Mawkynrew Konstitwensi, ha ryngkat ki nongrep katei ka thaiñ, ha ka 24 tarik Naitung, 2026, u la leit ban kynduh ïa u Timothy D. Shira, Myntri ba dei khmih ïa ka tnad ka rep ka riang ka Sorkar Jylla, ban ïakren halor kane ka mat.
Haba kren sha ki lad pathai khubor, u Bah Seiborlang, u la ong ba ka jinghiar dor u kubi haduh 2 tyngka shi kilo, ka la buh jingeh ïa ki nongrep ha kiba bun ki liang.
“Ki nongrep ka thaiñ Mawkynrew Konstitwensi, ha kine ki sngi ki ïadie ïa u kubi mar 2 tyngka shi kilo. Kane ka la ktah shaba palat ïa ki nongrep, namar ba ka jingdie 2 tyngka ïa u kubi ka la pynduna ban pyndap ha ka ïoh ka kot na ka bynta ki jingdonkam haïing hasem,” la ong u Bah Seiborlang.
U Bah Seiborlang u la ïathuh ruh, ba ha ki por ba la dep, u kubi um ju hiar dor palat hauh katta-katta, bad lada hiar ruh, u hiar ha ka dor 8 tyngka shi kilo, hynrei mynta ka snem hi kaba u kubi u la hiar dor shaba palat ha kaba ka dor u kubi ka poi tang 2 tyngka shi kilo, kaba la shem jingeh ïa ki nongrep.
U la ong ruh, ba ha ka jingïakren na ka liang u Myntri u pynpaw ba ki don ki Dalal (middleman), kiba pyntroiñ ïa ka dor u kubi, kaba kine ki Dalal ki shim ka dor kaba heh ban die pat sha kiwei ki jaka, katba na ki nongrep pat ki thied ha ka dor kaba tad.
U Bah Seiborlang u la pyntip ba haba ïadei bad kane, na ka liang u Myntri u la kular ban shimkhia mardor.
