Shillong, Naitung 24
U Bah Lektor Dkhar uba long u nongwad RTI, ha ka Sngi Thohdieng u la mih shakhmat ban pynpaw ïa ka jingsngewkhia haba ïadei ka jingïakynduh jingeh ki paidbah nongshong shnong jong ka East Jaiñtia Hills baroh kawei na ka daw ka jingbym don ka Food Corporation of India hapoh katei ka District.
Haba kren sha ki nongthoh khubor u la ïathuh ba ha ka 27 tarik u Jymmang 2025, da ka jingkitkhlieh ïa ka jingeh ki nongshong shnong u la buh ka jingkyrpad sha u Myntri Rangbah ka Jylla ba ka Sorkar kan buh noh ïa ka FCI Depot hapoh ka East Jaiñtia Hills District.
“Ka Sorkar ka la pdiang ïa kane ka jingkyrpad lyngba u Director of Food, Civil Supplies & Consumer Affairs, la phah ïa ka sha u General Manager, Food Corporation of India ha ka 2 tarik u Jylliew 2025 ban leh ïa kaba donkam, hynrei mynta la palat shi snem, haduh kane ka sngi ki paidbah ka East Jaiñtia Hills kim pat ïohi ïa kano-kano ka jingkiew shaphrang lane ka jingpynbna paidbah halor kane ka jingtyrwa, kane ka jingjah rngai ka pynlong ïa ki paidbah ban sngewkhia bad ban kwah tip ïa ka jingshisha” u la ong.
Shuh-shuh u la ong ba ki paidbah ki kwah ban pynshai ba kane kam dei ka mat saiñpyrthei bad kam dei ruh ka jingdawa shimet jong uwei u briew, hynrei ka dei ka jingdawa kaba mih na ka jingdonkam jong ki paidbah baroh. “Ka long ka jingdawa na ka bynta ki longïing kiba duk, ki nongïoh jingïarap lyngba ka Public Distribution System (PDS), ki nongrep, ki nongkit mar, ki nongñiah kali, bad baroh kiba shaniah ha ka jingsam khaw paidbah” u la ong.
U la kdew ba ka East Jaiñtia Hills ka long ka District kaba kongsan eh ha Meghalaya. Ka don bun ki karkhana, ka don ïa u pud bad ka Jylla Assam bad ka don bun ki shnong kiba jngai, hynrei haduh mynta katei ka District ka dang sahdien haba ïadei ka jingdon ïa ka FCI Depot.
U la ïathuh ba man ka por ba poi khaw ki paidbah ki dang hap ban kit na ki jaka kiba jngai, kaba pynslem ïa ka jingsam ïa u khaw bad kane ka pynlut bun ïa ka pisa paidbah bad ka buh jingeh shibun ïa ki paidbah.
U la ong ba ki paidbah ka East Jaiñtia Hills ki dei hok ban ïoh ïa kajuh ka jingtei paidbah kumba la ïoh da kiwei pat ki District jong ka Jylla. Ka jingryntih bad ka jingbishar hok ka dei ban long na ka bynta baroh, ym tang na ka bynta katto katne ki jaka.
Haba pynpaw ïa ki jingmyntoi jong ka FCI Depot, u la kdew ba ka dei ka jingkyrshan ïa ka jingshngaiñ jong ki paidbah nongbam. Ka dei ka lad ban pynthikna ba u khaw paidbah un poi ha ka por kaba biang. Ka dei ka lad ban pynduna ïa ka jinglut ha ka kit ka bah, ban pynduna ïa ka jingpynslem ha ka jingsam khaw, ban thaw lad kamai na ka bynta ki samla bad ki nongtrei shnong, ban pynbiang ïa ki marbam jingïarap ha ki por ba jia ki jingjia ba kyrkieh bad ban pynkhlaiñ ïa ka jingpyntreikam ïa ka National Food Security Act bad kiwei pat ki skhim jingïarap jong ka Sorkar.
