Shillong, Naitung 24
Ka President ka Meghalaya Pradesh Mahila Congress ka Kong Joplin Shylla ka la pyntip ba ka Congress na Meghalaya bad na kylleng ki Jylla ka thaiñ Shatei Lam-Mihngi kin leit kham bun sha Delhi ban leit kyrshan ïa ki samla kiba dang ïakhih ha Jantar Mantar lada ka Sorkar BJP kam sngap ïa ka jingdawa jong ki.
Ka Kong Joplin ka la ïathuh ba ki nongïalam ka Congress na Meghalaya hapoh ka jingïalam u Bah Manuel Badwar uba dei u Secretary ka MPCC bad u Bah Banphira Basaiawmoit ki la poi sha Delhi ban leit ai jingkyrshan ïa ki samla kiba dang ïakhih mynta ha Jantar Mantar ha nongbah Delhi.
Ka la ïathuh ba kine ki nongïalam ka Congress ki la poi sha Delhi mynhynnin ka sngi bad mynta ka sngi ki la leit ban ai jingkyrshan ïa ki samla kiba dang ïakhih.
Shuh shuh ka la ïathuh ba ki nongïalam ka Congress kin don katto katne sngi ha Delhi bad kin sa wanphai noh.
“Lada ka Sorkar BJP kam treh ban pynhiar shuki ïa u Dharmendra Pradhan kum u Myntri ka Sorkar India uba peit ïa ka pule puthi, ka Congress na Meghalaya bad na ki thaiñ Shatei Lam-Mihngi ngin leit kham bun ban kyrshan ïa ki samla sha Jantar Mantar,” ka la ong.
Ka la pynpaw ka jingsngewsih ban ïohi haba ki samla ki la pynlong ka jingïakhih la palat shi bnai ha Jantar Mantar hynrei ka Sorkar BJP ka dang leh mynthi ïa ka jingdawa jong ki namar ka jinglait tuh ki jingkylli eksam NEET.
Ki riew rangbah na Meghalaya kiba la poi nyngkong ban ai jingkyrshan ïa ki samla sha Delhi ki long u Ram Khrobormi Shyrmang uba dei tang ma u, u riew paidbah uba na ka shnong trai na Jalaphet, kaba hap ha East Jaiñtia, u la mih na Guwahati da ka rel ha ka 17 tarik mynta u bnai bad u la poi sha Delhi ha ka 19 tarik da ka jingsynranlang ki hynmen bad para ban ïashimbynta ha ka jingleit tur sha Parliament ha ka 20 tarik mynta hi u bnai.
Hadien kata la ïohi sa ïa u Bah Mayborn Lyngdoh uba dei u nonghikai u la poi sha Jantar Mantar ha ka 23 tarik mynta u bnai. Ki nongïalam jong ka KSU Delhi Unit ruh kumjuh.
Kumjuh ruh ha ka ka 24 tarik la ïohi sa ïa ki nongïalam ka VPP Youth Wing ha jingïalam u Bah Marbud Dkhar ki la leit ban ïakynduh ïa u nongseng ka CJP u Abhijeet Dipke ha jaka ba u shong ma u.
Nangta la ïohi ruh mynta ka sngi hi sa ïa ki nongïalam ka MPCC ha jingïalam u Bah Manuel Badwar kiba la poi sha Jantar Mantar.
