Shillong, Naitung 24
U Symbud Myntri Rangbah ka Jylla Bah Sniawbhalang Dhar u la pynbna ba ka Sorkar Meghalaya ka thmu ban ïarap pisa sha palat 2 lak ngut ki nongrep ha kylleng ka Jylla hapoh kane ka samoi treikam ba mynta jong ka Sorkar MDA.
Haba kren ha ka jingïalang paidbah ha Patharkhmah ban ïalap ilekshon na ka bynta u kyrtong ka NPP Shillong Lok Sabha u Dr. DRL Nonglait, u Bah Sniaw-bhalang u la ong ba ïa kane ka jingthmu la ïakren bad u Myntri Rangbah ka Jylla u Conrad K Sangma bad yn pyntreikam lyngba ki nong-trei ka seng bad ki seng nongrep.
“Nga la don ha ka jingïalang bad u Myntri Rangbah hynnin ka sngi. U la ong ïa nga ban pyntip sha ki nongtrei ka NPP bad ki seng nongrep ba ngin pyrshang ban pynkhreh ïa ka jingïarap pisa haduh 2 lak ngut ki nongrep hapoh kane ka samoi treikam,” la ong u Bah Sniawbhalang.
Katkum ka jingong jong u, ka jingïarap kan long hapdeng 5 hajar haduh 7 hajar tyngka na ka bynta uwei u nongrep.
“Ki don kiba ïoh T.5 hajar, don kiba ïoh T.6 hajar bad T.7 hajar. Kane ka jingïarap pisa ka long ban aibor ïa ki ban pynïar ïa ka rep ka riang bad ki kam kiba ïadei bad kane,” u la bynrap.
Haba pynpaw ïa ka jingpyrkhat jong ka Sorkar ha ka liang ka rep ka riang, u la kdew ba ki don shibun ki nongrep ha kane ka thaiñ bad ba ka jingkyrshan na ka Sorkar MDA ba la ïalam da ka NPP ka la long kaba “khraw bha.”
U Bah Sniawbhalang u la kren ruh halor ki kam jong ka Sorkar ha ki jaka khappud, da kaba pynpaw ba ka Sorkar kaba mynta ka la shim ïa ki sienjam kiba ki Sorkar barim kim shym la shim.
“Phi hi phi tip kham bha ïa kaei kaba ka Sorkar ka la leh ha kaba ïadei bad ki jaka khappud. Ym don kano-kano ka Sorkar kaba mynshwa kaba la shlur ban shim ïa ki rai na ka bynta ka suk ka saiñ bad ka bha ka miat jong ki paidbah jong ngi,” u la ong.
U la pynshai shuh-shuh ïa ki khubor shaphang ka jingkynnoh ba la duh jaka, da kaba ong ba ka Sorkar ka la leit jngoh ïa baroh ki jaka khappud ban pynthikna ba ki nongshong shnong kin im ha ka jingsuk bad jingshngaiñ.
“Kum ka Sorkar ngi la leit ban jngoh ïa baroh ki thaiñ khappud ban pynthikna ba ki briew jong ngi kin im suk im saiñ bad kin ïoh kamai jakpoh khnang ba ka ïoh ka kot jong ki kan kiew,” la ong u Bah Sniawbhalang.
