Shillong, Naitung 24
U Myntri ka tnad pule-puthi, u Bah Lahkmen Rymbui ha ka Sngi Thohdieng u la ong ba ka Sorkar Jylla shen kan sa sdang ïa ka jingthungkam ban pyndap ïa palat 700 tylli ki kam nonghikai kiba lait ha ki skul Sorkar Lower Primary ha kylleng ka Jylla.
Haba kren sha ki lad pathai khubor, u Bah Rymbui u la ong ba ïa ka Meghalaya Teacher Eligibility Test (MTET) la pynlong ha ka Sngi Thohdieng, kaba long ka sienjam kaba kongsan ha ka jingthung kam.
“Ngi don palat 700 tylli ki kam nonghikai kiba lait tang ha ki skul Sorkar Lower Primary. Ka jingpynbna na ka bynta ka jingthung kam kan sa mih shen,” la ong u Myntri.
Shuh shuh u Bah Rymbui u la kren shaphang ki kam ba lait ha ki skul ba kyrshan ka Sorkar ne ki ‘Aided-School’, da kaba kdew ba ka jingthung kam ha ki katto-katne na kine ki shlem pule kam shym la jia la katto-katne snem mynta.
“Ki don ruh katto-katne ki kam ba lait ha kine ki skul ha kaba ka jingthung kam shym la jia la katto-katne snem mynta. Ngin ai jingbit katkum ka jingkhmih ïa ka jinglong-jingman khnang ba ka jingthung kam kan sdang noh hadien katto-katne bnai,” u la bynrap.
