Shillong, Naitung 24
Ki samla pule kiba dang ïaid shakhmat bad ka jingïakhih ha Jantar Mantar, Delhi ki la pyneh beit triang ha ka jingïakynduh ïa ki Myntri ka Sorkar India, ba kin nym weng satia ïa ka jingïakhih lada u Dharmendra Pradhan um hiar shuki ne weng noh ïa u na ka shuki Myntri.
Kane ka jingpyneh beit jong ki samla pule kaba la lamkhmat da ka Cockroach Janta Party (CJP) ka dei ha ka jingïakynduh jong kiba mihkhmat ïa ki samla pule bad ki ar ngut ki Myntri ka Sorkar India, kata ïa u JP Nadda Myntri ka tnad ka koit ka khiah bad u Myntri Khynnah ba khmih ka tnad PMO u Jitendra Singh kaba la long ha ka sngi Thohdieng ha Constitution Club of India, ka jaka kaba la jied hi da ki samla ban ïakynduh.
Ki samla kiba mihkhmat ha kane ka jingïakren bad ki Myntri ka Sorkar India, kata u Saurav Das bad u Ashutosh Ranka, ki la ong ba ka Sorkar ka la pan por haduh ka sngi Saitjaiñ ha kaba ïadei bad ka jingdawa hiar shuki jong u Myntri.
“Ka Sorkar ka la pan por haduh lashai ka sngi Saitjaiñ halor ka jingdawa jong ngi, kata ban pynhiar shuki noh ïa u Dharmendra Pradhan. Ngi don ka jingkyrmen ba ka Sorkar kan weng noh kloi ïa u,” la ong u Saurav Das.
Ha kaba ïadei bad kiwei ar tylli ki jingdawa pat, na ka liang jong u Ashutosh Ranka u la ïathuh ba ka Sorkar India ka la pynpaw ïa ka jingmynjur, kata ban siew ïa ka bailutksan kaba long mar shi klur sha ki longïing jong kito ki lanot ba ïakhun ïa ka NEET kiba la shim noh ïa la ka jingim bad kawei pat ka jingdawa ka long ban weng bad pyndam noh mardor ïa baroh ki jingujor ejahar (FIR), ki case ba la register ïa ki samla pule.
Ha kawei pat ka liang, ki la pynpaw ba ka jingïakhih kan dang ïai bteng beit tad haduh ban da ïoh ïa ka jingdawa kata ka jinghiar shuki jong u Dharmendra Pradhan. Ki la ong ruh ba ki la ong ïa kitei ki ar ngut ki Myntri ba kin rah ïa kane ka khubor sha u Myntri Rangbahduh ka Ri u Narendra Modi ban leh ïa kaba donkam. Ki la pynpaw ruh ba lada u Myntri Rangbahduh um leh eiei ne ban pynhiar shuki ïa u Dharmendra Pradhan, kane ka jingïakhih kan sa long kaba kham heh shuh-shuh bad ha kata ka por ka jingdawa hiar shuki kan nym dei shuh ïa u Dharmendra Pradhan hynrei kan dei syndon ïa ka shuki jong u Narendra Modi.
