Shillong, Naitung 24
Ka kynhun ki pulit ka Anti Narcotics Task Force (ANTF) na West Garo Hills ryngkat bad ki CRPF ha ka step jong ka sngi Thohdieng ki la kem noh ïa uwei u briew ba la kynnoh snar nongkhaïi drok na Mahendra Colony.
Kane ka jingïoh kem noh ïa utei u briew ka la long hadien ka jingïoh ïa ki jingtip kiba bniah halor jong u.
Une u suba nongkhaïi drok u dei uba la tip kyrteng kum u Toseng R Sangma, 30 snem na ka shnong Alokpang, Bulawe, South Garo Hills. La ong ba une u briew u la ïaleh ban ïakhun bad ruh ban shoh ïa ki pulit da ka jingthmu ban phet krad. La ong hadien jong ka jingïaleh katto katne, la lah ban pynjem khnap noh ïa u bad bat noh.
Ar ngut ki pulit ki la mynsaw malu mala ha ka por jong ka jingleit ban kem ïa une u briew bad la ong ruh ba une u briew ruh u la mynsaw ha kane ka jingïaleh ban lait na ka jingshah kem.
Hadien ba la bat noh, ki pulit ki la ïoh ban kurup haduh 11 tylli ki ‘vials’ kiba la suba thep ïa u drok heroin, 7 tylli ki ‘vials’ kiba thylli bad ka pisa kaba long T.12,060/- na ka met jong une u briew. Ïa une u drok ba la ïoh kurup hadien ba la thew, u la don ka jingkhia kaba 1.49 gram bad ba la kurup ïa une u mar ha ka jingïadon lang jong ki nongsakhi na ka liang ki paidbah.
Une u briew u dei uba la donkti man ka por ha kane ka kam bad ruh uba la shah pynngat ha kiba bun tylli ki case jong ka NDPS kiba la register pyrshah ïa u.
