Shillong, Naitung 26
Ka All Jaiñtia Mid-Day Meal Workers Union, ha ka jingïalang kaba la pynlong ha Ïingwalieh ka Dorbar Shnong Loomiongkjam, ha kaba la wan jingïashim bynta da ki nongshet ja sngi ha ki skul na kylleng ka Ri Lum Jaiñtia, ha ka 25 tarik u Naitung, 2026, ka la shim ïa ka rai ba lada ka Sorkar Pdeng kam pynkiew ïa ka bhah pisa ba la siew sha ki nongshet ja skul na 900 tyngka sha ka 9,000 tyngka shi bnai, kin sa sangeh noh ban trei bad dawa ruh ban pynsangeh noh ïa ka PM POSHAN Scheme.
Ka seng ka la dawa, ba ha ka jaka ban siew tulop tang 10 bnai ha ka shisnem, dei ban siew noh 12 bnai pura bad kyntu ïa ka Sorkar ba kan ai jingïarap ruh ïa ki khun jong ki nongshet ja skul, khnang ba kin ïoh ka jingshngaiñ bad ka jingïarap kaba biang.
Kane ka jingmaham ka la mih hadien ba ka seng ka la dep phah ïa ki jingthoh sha u Myntri Rangbahduh ka Ri, u Narendra Modi bad kumjuh sha ka Myntri ba khmih ïa ka tnad pla tyngka, ka Nirmala Sitharaman, ha ka por ba ka wan jurip sha Ri Lum Jaiñtia.
U nongaibuit ka seng, u Bah K.L. Pariat, u la ong ba lada ym don satia kano-kano ka dak jong ka jingpdiang ïa ki jingdawa ha ka Dorbar Lok Sabha bad Rajya Sabha, ka seng kan sa shim ïa ka rai ban sangeh noh ban trei.
U la ong ruh ba ka jingthoh ban pynkiew ïa ka honorarium la dep phah sha u Myntri Rangbahduh naduh u snem 2022, hynrei haduh mynta ym pat shym la ïoh jubab kaba sngewtynnad.
U la pynkynmaw ruh ïa ki katto katne ki jingjop ba ka seng ka la ïoh lyngba ki jingïakhih, kynthup ïa ka jingpynpoi beit ïa ka tulop sha ki bank account jong ki nongtrei bad ka jingpynkiew ïa ka bhah jingïarap na ka liang ka Sorkar Jylla, na 100 sha 1,100 tyngka.
