Shillong, Naitung 26
Ka State Disaster Response Force (SDRF) ha ka sngi U Blei ka la lah ban pynkut noh jingwad ïa u briew hadien saw sngi, hadien ba ka la ïoh tam ïa ka metïap u briew uba jah na Wahñiangleng kaba don marjan ka Phra Mer, Mylliem.
Ïa ka met la ïoh ban sei ha ka por kumba 7:10 mynstep ha ka 26 tarik Naitung, 2026. Ka SDRF kala pynlong ïa ka jingwad briew kaba la sdang naduh ka 22 tarik Naitung hadien ka jingïoh jingtip halor ka jingjah jong uwei u nongshnong shnong ka Phra Mer.
Kumta na ka liang jong ka SDRF ha ryngkat ka jingïatreilang bad ki Pulit ka Mawngap bad ka jingïarap ki trai shnong ka Laitkroh bad Phra Mer, kala hiar ïa ka riat bad ñiom ïa ki rud wah ban wad ïa une u briew.
Ha kane ka jinghiar wad, ka SDRF ka la pyndonkam ruh da ka Rubber Inflatable Boat (RIB) ne ka lieng jri ba shu put lyer ban wad ha kylleng ka lynter jong ka dam Mawphlang.
Ha ka 23 bad 24 tarik mynta u bnai, la pynlong ka jingwad kaba jur naduh Dam Mawphlang sha ka wah Wahñiangleng da kaba pyndonkam da ka Rubber Inflatable Boat (RIB), hynrei la ong ba ym shym la lap satia ïa une u briew ba jah.
Dei ha ka 25 tarik ba ki nongshong shnong ki la lap ïa ka metïap ha kawei na ki bynta jong ka wah. Kumta na ka liang jong ka SDRF mar mar ki la sdang ïa ka kam ban leit sei ïa ka met hynrei la hap ban pynsangeh noh ïa ka kam namar ka jingkhlaiñ bor palat jong ka um.
Ïa kane ka kam la bteng biang ha ka step sngi U Blei bad dei ha ka por 7.10 mynstep ba la ïoh ban sei noh ïa ka metïap. Ïa ka metïap la aiti noh sha ki Pulit ka Mawngap ba kin pyndep ïa ki jingdonkam katkum ka ain kynthup ka post mortem.
