Nongstoiñ, Naitung 26
Kum shibynta ban ïa snohktilang bad kum ka jingai mynsiem bad ka jingkitbok kit riwang ïa ki samla pule kiba ïakhih halor ka jinglait tuh ki jingkylli NEET bad ka jingshah pynmynsaw ki samla pule ha kylleng ka ri India, ha ka janmiet jong ka sngi Saitjaiñ ka taiew ka District Congress Committee, West Khasi Hills ha ryngkat ka Nongstoiñ Block Congress Committee ki la ïoh ban pynlong ïa ka jingthang mombati hapoh ka sor Nongstoiñ ïa kaba la ïa shimbynta da ki nongkitkam jong ka congress kynthup ïa ki samla bad longkmie.
Ha kane ka jingïalang thang mombati nalor u Bah Erick Kharsyntiew, President DCC la donlang ruh u Bah R Kharbuli Working President DCC, Bah G. Ningstar Marthong President NBCC, samla Gilbert Lyngkhoi President Nongstoiñ Assembly Youth Congress, ki mahila bad kiwei kiwei.
U Bah R Kharbuli haba kren ha ka jingïalang ba lyngkot u la ong ba kum ka seng bad kum u nongïalam u Rahul Gandhi uba dei uwei na ki nongïalam ba khraw uba ïaid na kawei ka jaka sha kawei pat ban pyrshah ïa ki kam khyllah kiba jia hapoh ka Ri bad katba u Rahul u dang pyrshah ïa kiba bun ki bynta la i kumba kiwei ki shu peit bad shu rkhie beiñ ïa u hynrei mynta ka pynpaw sha ka pyrthei ba kiei kiei baroh kiba jia ki dei kiba jia shisha.
U la ong ruh ba dang myn ha kane u Rahul u dang pyrshah da kaba u ïaid kylleng ka Ri India ïa ka ‘Vote Chori’ bad kiwei pat ki seng ki rkhie beiñ bad ki ong ba kine kiei kiei ki dei tang ki jingmutdur bad ki jingkynnoh jong ka congress hynrei kine kiei kiei kaba ka seng ka pyni sha ka pyrthei ki dei ki jingjia kiba shisha hapoh ka Ri India.
U la pynpaw ruh ïa ka jingaikhublei ïa ki nongïalam jong ka CJP kiba shim ïa ka sien jam lyngba jong ka mat kaba jia ha Jantar Mantar kaba ïadei bad ka jinglait tuh jong ki jingkylli kiba ïadei bad ka jingthoh ïa ka Entrance kaba dei jong ka NEET ban ïoh ban leit pule doktor.
“Kum ka seng, ka Congress ki ïa kmen lang bad ki nongïalam jong ka CJP kiba don ha Delhi ban sakhi ïa ka jinghiar shuki jong u Myntri ka tnad pule puthi ka Sorkar Pdeng u Dharmendra Pradhan,” u la ong.
U Bah Kharbuli la ïathuh ruh ba ha ka jingshisha ka seng kala ai jingtip sha baroh ki khun samla jong ka thaiñ hynrei ka pynpaw ïa ka jingngewdiaw ba kam ïohi ïa ki para samla ba kin ïa don ryngkat ban ïa shim bynta ban thang mombati ban pyni sha ka pyrthei ba ki khun samla na West Khasi Hills ki pyrshah jur ïa kiei kiei ki bym dei bad ka pule puthi.
“Ko ki para nongshong shnong ki don katto katne kiba dei ki Agent lane kita ki briew kiba don ha ka bor kiba ïadie ïa thied pynban ïa ka jingnang ka jingstad jong khun samla, bad na ka liang ka Congress bad ka Nongstoiñ Block Congress Committee ka ïeng ha ka nongrim jong ka jingkhuid ka jingpliah ha kaba ïadei bad ka pule ka puthi bad ïa kiwei kiwei pat ki sector ha ka jingïaid lynti ka jong ngi ha ka Ri india, ha ka Jylla, ha ka District ha ka thung kam thung jam kaba ïadei bad ki khun samla,” ong u Bah Kharbuli.
Shuh shuh u la ong ruh ba ka NBCC ka kwah ba ka Sorkar nangne shakhmat kan leh ïa kaei kaei kaba bha tam na ka bynta ki khun samla ba ka lawei ka jong ki, ba ka lawei jong ka Jylla hi baroh kawei kin ïoh ïa kata ka jingthrang ha ki khun samla bad ka jingkhuid ha ki bynta kiba bapher bapher .
U President ka District Congress Committee Bah Erick Kharsyntiew haba kren ha ka jingïalang u la ïathuh bad batai kumno ka jia bad balei ki samla ha Ri India ki pynlong ïa ka jingïakhih.
U la ong ruh ba ha kane ka Ri hi baroh kawei, ki samla ki sngewrit mynsiem bad ka jingrit mynsiem ka jong ki, ka ïalam ha ka jingïakhih bad kaba kham donkam mynta nalor ka jingiehnoh kam kum u Myntri ym dei kaba la kut noh bad ki samla kiba ïakhih ym ban shu kmen namar ba la hiar shuki hynrei kaba kham hakhmat ka long ba donkam ban kren ïa ka Sorkar ba ka donkam ban pynkylla ha kaba ïadei bad ki ain ha ka pule puthi khnang ba kata ka jingdie tuh ïa ki jingkylli lane ka khaïi ïa ki khun samla kan nym jia shuh.
“Ngi ai ka jingïaroh kaba pura ïa ki samla kiba la ïakhih ha Jantar Mantar kaba la poi ha ka jingjop ïa kaba u Myntri u la hiar shuki noh hynrei kam pat kut ka donkam ban ïakren bad ka polisi, ka dei ban pynbeit ba ka rukom thung kam bapher bapher kan long ryntih khnang ba kino kino kiba kwah ban shim kabu kin nym lah,” ong u Bah Kharsyntiew.
