Shillong, Naitung 26
Ka Bharatiya Janata Party (BJP) ha ka Sngi U Blei ka la ong ba u Myntri ka tnad pule-puthi ka Sorkar Pdeng, u Dharmendra Pradhan u la iehnoh kam hi dalade bad ym lyngba kano-kano ka jingpynbor, da kaba pynskhem ba ïa kane ka rai la shim ban pyntikna ba kito “kiba pyrshah-ri bad ki bor kiba nabar” kin ym shim kabu ïa ka jinglong-jingman.
Ha ka kyrwoh ba la pyllait da u Nongaiktien ka BJP Meghalaya Pradesh, u Arnab Das, ka seng ka la ong ba ka Sorkar Pdeng ka don ka jingsngewthuh ïa ki samla pule bad ka angnud ban trei na ka bynta ka lawei jong ka pateng ban wan.
“Ka jingthmu ka long ban khanglad ïa kito kiba pyrshah-ri bad ki bor ba nabar ban shim kabu ïa ka jinglong-jingman,” la ong ka kyrwoh.
Ka seng ka la ong shuh-shuh ba ka Sorkar ka la pynkhreh ban wanrah ïa ki jingkylla kiba beit ba ryntih ha ka liang ka pule-puthi kiba la “shah iehnoh la slem bah ha ki Sorkar ba mynshuwa.”
Katkum ka kyrwoh, yn pynlong ïa ka rukom pynïaid eksamin “kaba pyrkhing bha bad kaba kham suk.”
Haba kynthoh ïa ki Jylla ba synshar da ki Liang Pyrshah, ka BJP ka la kynnoh ba ka jinglait tuh ki jingkylli ka la jia dang shen ha ki Jylla bym synshar ka BJP kum ha Karnataka bad Jammu & Kashmir, hynrei “ym shym don mano-mano ba shim ka jingkitkhlieh.”
