Ka jingdon bad tuid jong ki nongjngohkai pyrthei sha kino kino ki jaka jngohkai pyrthei ha kino kino ki bynta ka ju long shisha ka jingkyrkhu ym tang ïa kato ka jaka hynrei khamtam ïa ki nongshong shnong. Lyngba ki nongwan jngohkai pyrthei, ka plie ruh ïa ka ailad ïohkam ïohjam bad kyntiew ruh ïa ka ïoh ka kot ym tang jong ka shnong hynrei kumjuh ruh ïa ka jylla. Ngi sakhi ba ha rilum Khasi-Jaiñtia, ka jingdon jong kiba bun ki jaka jngohkai kiba itynnad naduh ki kshaid, ki lum, ki wah kiba ithiang ki la khring bha ïa ki nongwan jngohkai pyrthei ym tang na ka jylla ne na ki jylla jong ka ri hynrei wat ruh na kylleng ki ri jong ka pyrthei.
Kat nangmih u snem, ka jingwan jong ki nongwan jngohkai pyrthei ruh ka la nangbun nangbun khamtam lei ba kat nangmih u snem, nangmih shuh shuh ki jaka kiba itynnad. Teng teng lei wat kiba bun ki trai shnong kim pat tip ne ïohi ïa ki jaka kiba itynnad, kaba ki briew ba nabar ki la lap bad ïa kine ki jinglap jong ki ïa ki jaka kiba itynnad lah ruh ban sakhi lyngba ki kor social media, kaba ki la buh. Lyngba ka jingtuid jong ki nongwan jngohkai pyrthei, ngi la ïoh ban sakhi ruh ba ki la mih bun ki dukan rud surok kiba die ïa ki jingdie kiba bun jait naduh ki dukan sha ja, dukan soh, ki dukan die khutia mutia, ki dukan ba har-rukom na ka bynta ban ïoh ïa ka kamai kajih ban pyndap bad pynbiang ha la ki ïing ki sem.
Hynrei kat nangïaid ki por bad ki snem bad watla ka jingtuid jong ki nongjngohkai pyrthei ruh ka la jur bha hynrei la sakhi pat ba kiba bun ki briew kiba wan kai sha ki jaka jngohkai bapher bapher khamtam kum sha ka thaiñ Dawki, Mawlynnong, Sohra, Umiam bad sha kiwei kiwei ki jaka bad kumjuh ruh sha ki jaka jngohkai ha rilum Jaiñtia, ki la don bun kiba la wanrah hi noh ïa la ka jong ka bam ka dih khamtam lei kito kiba wan da ki bos rit. Ym tang ba ki wanrah ïa la ka jong ka bam, hynrei la ju sakhi ba haba ki hiar sha ki jaka jngohkai pyrthei, ki ju ïeng ha kino kino ki bynta jong ka rud surok bad ha kaba ki sei ïa ki shylliah, ki tiar shet ne ka bam ba la dep shet ban ïa bam ryngkat ka jingleh kmen ïa ka jingpyngngad bad itynnad ka jaka. Hynrei ynda ki la dep ban mih na kane ka jaka, la lap ba ki la shu bret pathar ïa ki tiar kiba la dep ban pyndonkam, kum ki pliang kot, ki bilor um, ki bitor kyiad bad ruh ka jaboh bad ban pynjaboh ïa ka lynter jong ka surok, kaba pyni ba kim don satia ka jingburom la ka long ïa ka mariang ne ïa ka jaka, kaba ktah pat shibun ïa ka jingitynnad bad ruh pynjah burom hakhmat kiwei pat ki briew kiba lap ïa kane.
Kum ki shnong kiba dei ki nongpeit nongkhmih ne ki bor ba dei peit bad wat kum ki trai shnong ruh haba lap ïa kum kane ka jingleh, ym dei ban shah bad dei ban phah lum phah lang beit bad dei ban phah sha ki jaka kiba biang bad ruh ban bthah ba kim dei satia ban bret pathar ïa ki jaboh jabaiñ kat shaba lap ba shem. Kumjuh ruh kum ki nongwan kai ki dei ban burom bad kiar na kaba bret pathar sha ki jaboh jabaiñ. Ïa kum kine kiei kiei, ngi lah ban shem ha kylleng ki jaka jngohkai pyrthei. Kumta kum ki shnong ki thaw bad wat ki nongshong shnong ki dei ban mih shakhmat bad ban khang pyrshah haba lap ïa ki briew kiba pynjaboh bad bret pathar. Haba lap dei ban phah pynkhuid hi ha kito ki nongbret bad kum ha kane kajuk jong ka jingkhlaiñ ka kor digital, dei ban ring dur ïa ka jingleh thurmur bad bret pathar ïa ki jaboh jabaiñ khnang ba kan long pat ka jingsneng bad nuksa na ka bynta kiwei.
