Shillong, Naitung 27
Ha ka step jong ka 27 tarik u Naitung 2026, la lap ïa kawei ka metïap jong uwei u rangbah briew, narud surok ka lynti shuwa ban poi ha Larity, Mawdiangdiang, Shillong.
Katkum ki khubor ba la ïoh lum, la ong ba ïa ka metïap jong u tei u rangbah la lap da ki briew ba ïaid lynti, bad mar-mar ki la pyntip sha ki bor pulit ka Mawdiangdiang Outpost kiba la wan poi bad ka kynhun na ka Crime Scene Unit ban pynlong ka jingwad bniah nalor ki sakhi sabut.
Katkum ki dur ba la ïoh ring, la ïohi ba ka met jong une u rangbah, ka la dap tang da ka snam suda bad ym ithuh shuh ïa ka dur khmat, namar ba ka la jur palat ka jingphlei snam.
Une u rangbah uba la shah dung wait bad ïap, la tip kyrteng u Bah Shanbor Rani, 38 snem ka rta, uba shong basah ha Nongmynsong Lumshyiap. Kane ka jingjia kadei kaba la jia ha ka miet jong ka 26 tarik u Naitung 2026.
Ki tyllong khubor ki ïathuh, ba la don 3 ngut kiba la shah dungwait kynthup uba ïap, halor kane ka juh ka jingjia, ha kaba u wei u la shah sumar ha NEIGRIHMS, katba u wei pat ym pat tip haduh mynta.
Katkum ka jingïoh lum khubor na ki bor pulit hadien ba ki la rah noh ïa ka metïap jong u Bah Shanbor ha NEIGRIHMS, la ong ba la lap ba don dak kumba 12 wait ba shah mait, na u ryndang bad na ka met ruh kumjuh.
Lah ban kdew ba kane kadei ka jingjia kaba shyrkhei, ha kaba ki riewsniew ki la shim ïa ka jingim u Bah Shanbor, da kaba mait haduh 12 wait.
Ki bor pulit ki la ïathuh, ba ki don 6 ngut ki briew kiba la kah dur bha ïalade, ki la rah jubor ïa ki 3 ngut ki briew bad thep hapoh ka taxi, kaba don ïa u registration number ML 05 AH 3636, bad ki la kit ïa ki sha Mawbeh bad pynïap ïa une u rangbah hangta.
U wei pat napdeng kine, u la mynsaw bad la pynkit ïa u sha NEIGRIHMS, katba u wei pat u la lait phet, ha kaba u la ïathuh ha ki pulit, ba u la rynsied napoh ka kali bad la lap ïa u da ki shipai BSF, kiba la rah noh ban sumar ïa u, la pyntip ki pulit.
Haba ïadei bad kane ka jingjia, ki bor pulit ki dang pynlong ka jingtohkit ban lap thikna ïa ka daw jong kane ka jingjia shah dungwait.
Shuh shuh la ong ba ha ka miet 26 tarik u Naitung, 2026, kumba ha ka por 10 baje ei-ei u Bah Shanbor Rani u la ïadonlang bad u Budlang Kharkongor lem u Joe hajan Post Office ha Umkdait, Nongmynsong.
La ïathuh ruh, ba ki ap ïa kali u Bah Shanbor ka local taxi, kaba don ïa u Registration Number ML 05 AH 3636 bad haba ka la wan pat la don hynriew ngut hapoh katei ka kali, kiba tap ïa la ki dur khmat.
Mar ïa poi, kitei ki hynriew ngut ki la kynrup bad rahbor ïa ki lai ngut sha Mawbeh bad dei ha katei ka jaka, ba ki la dung bad mait ïa u Bah Shanbor. La ong ba u Budlang u la lait da ka said bad phet na katei ka jaka bad hadien u leit poi shajan BSF Camp ha Nongmynsong bad la rah ïa u da ki shipai sha NEIGRIHMS.
Ki hynriew ngut ki la dung la mait ïa u Bah Shanbor haduh ban da ïap bad ki sa leit bret ha katei ka jaka harud surok Mawdiangdiang.
