Shillong, Naitung 27
U Superintendent of Police (SP) East Khasi Hills u Bah Vivek Syiem u la ïathuh ba ki pulit ki la ïoh pdiang ïa ka ejahar bad ki dang pynlong ka jingwad ïa ka kali ba kynnoh tynrah ïa ka scooty ha Golflink, kaba shim ruh ïa ka jingim jong 2 ngut ki samla.
Lah ban kdew ba 2 ngut ki samla, kata u Benjamin Shabong (18 snem) na Mawpun bad ka Fabela Grace (17 snem) na Pynthor, kiba shong scooty ki la ïap hashen hadien ba shah tynrah ha Golflink ha ka miet jong ka 26 tarik u Naitung 2026.
Kine ki ar ngut ki samla ki la duh noh ïa la ka jingim, hadien ba ka scooty kaba ki shong, ka la shah tynrah ha kawei ka kali kaba phet krad (hit-and-run) na ka jaka, kaba jia ha Golflink hynnin ka miet.
Haba kren sha ki lad pathai khubor, u SP u la ïathuh ba hadien ba ïoh jingtip halor kane ka jingjia, ki pulit ki la poi mar-mar sha ka jaka bad la pynkit ïa kine ar ngut sha Civil Hospital, hynrei ki doktor ki la pynbna ba ki la khlad lypa.
U SP u la ïathuh, ba ki pulit ki la register ïa ka ‘Unnatural Death (UD) case’ bad ki dang pynlong ïa ka jingtohkit ban ithuh ïa ka kali kaba la tynrah ïa kine ar ngut. U la ong ba haduh mynta, ym pat lah ban ong, mano ba bakla ha kane ka jingjia.
“Hynrei u la ong ba kawei kaba la shai mynta ka long ba ki bahaïing jong ki 2 ngut ki samla, ki la ujor da ka ejahar. Katkum ka aiñ, u nongñiah uba la tynrah u dei ban aiti noh ïalade sha ki pulit mar-mar. Da kaba um shym la leh kumta bad phet noh na ka jaka, ka pyni ba u lah ban don bynta ha ka jingbakla” u la ong.
“Ngi la pynrung mukotduma pyrshah ïa u nongñiah bad ruh pyrshah ïa ka kali kaba la don bynta ha kane ka jingjia. Ngin dang bteng ïa ka jingtohkit bad ngin sa lap ïa ka kali,” la ong u SP.
