Shillong, Naitung 27
Ka Hynñiewtrep Youth Council (HYC) ha ka lah sngi u Blei ka la leit ban pan jingshai na u Officer on Special Duty (OSD) jong ka SSA SEMAM u Dr. Andrew Warjri halor ki kynrum kynram haba ïadei bad ka jingpynbna thungkam ha ka Meghalaya CM LEAD Fellowship Recruitment bad dawa ban pynbeit mardor ïa kane.
Haba kren sha ki nongthoh khubor u President ka HYC u Bah Roy Kupar Synrem, u la ong ba ka Sorkar Jylla ka la pynmih ïa ka jingpynbna (Advertisement) ba lait 12 tylli ki kam Fellowship kaba la tip kum ka Chief Minister Leadership in Education and Development Fellowship. Hynrei kaba sngewlyngngoh ka long na kine ki 12 tylli ki kam ba lait, 8 tylli la bhah na bynta ki samla trai ri bad 4 tylli na bynta ki briew ba nabar.
Shuh-shuh u la pynpaw ïa ka jinglyngngoh ba ka Sorkar ha ka jingpynbna ba ka pynmih ka khlem kdew ba yn bhah 4 tylli ki kam na bynta ki briew nabar bad 8 tylli na bynta ki trai ri. Halor kane, na ka liang ka HYC ka la phah da ka jingthoh sha u Myntri Rangbah ka Jylla u Conrad K. Sangma lyngba u OSD ka SSA- SEMAM ban dawa ba dei ban pynbeit mardor ïa kane ka bynta bad u la byrngem ruh ïa ka Sorkar ba lada kam lah ban pynbeit, ka seng kan ym ailad ban ïaid shakhmat ka ‘Personal Interview’ ka ban long ha ka 30 bad 31 tarik, Naitung 2026. U Bah Roy u la ïaroh ïa kane ka jingthmu jong ka Sorkar ban buh ïa ki 12 ngut ki Ophisar ban don ha man la ki District jong ka Jylla ba kin ïatreilang ryngkat ki tnad treikam ka Sorkar ban pyntikna ba ki skhim bapher ka Sorkar Jylla kiba ïadei ha ka tnad pule puthi dei ban pyntreikam bad lada lap ïa kino-kino ki jingbym biang kine kin long kum ki nongai khubor sha ka Sorkar ïa ki jingdonkam.
U la ban jur ba ki samla trai Jylla kin dei kiba biang tam ban shimti ïa kane ka kam namar ki kham tip bha ïa ka jinglong jingman ki briew ha ka Jylla kum ha ka ktien thylliej, ka riti dustur bad ka jinglong jingman hapoh ka imlang sahlang. Ka HYC ka la dawa ba ka Sorkar Jylla ka dei ban weng mardor ïa kane ka bhah ba la mang na bynta ki briew ba nabar bad ka Sorkar ka dei ban sngewthuh ba kum kine ki projek dei ban thung ïa ki briew trai ri namar ba ki don bun ki samla kiba la tbit ban trei ïa kane ka kam.
“Ka HYC ka kwah ban kren shai ba kam pyrshah ïa kiwei ki kyrtong na kiwei ki Jylla ban ïakhun ha ki eksamin thep kam hapoh Meghalaya, hynrei ka pyrshah ïa ka Policy kaba thmu ban pynduh kam ïa ki samla trai Jylla ha ki Program ne skhim ba kyrshan hi da ka Sorkar Jylla” la ong u Bah Roy. Halor kane ka HYC ka la dawa ba ka Sorkar kan bishar bniah biang bad wanrah jingpynkylla ha ka Fellowship Guidelines da kaba weng noh ïa ka kyndon ba la mang kyrpang ban thung 4 ngut kiba na bar ka Jylla.
