Shillong, Naitung 27
Ka Kynhun Myntri ka Jylla ha ka Lah Sngi U Blei ka la mynjur ïa ka Meghalaya Electric Vehicle Policy (MEVP) 2026, da kaba wanrah ïa ka jingai jingmyntoi kaba T.25,000 bad ka jingmap pura ïa ka bai pynrung kyrteng ban pynlong ïa ki kali ilektrik kiba kham bit dor bad kiba lah ban ïoh da kaba suk.
Ïa kane ka rai la shim ha ka jingïalang jong ka Kynhun Myntri ba la pynïaid da u Myntri Rangbah ka Jylla, u Conrad K. Sangma.
Haba kren sha ki lad pathai khubor, u Myntri Sorkar, u Marcuise N. Marak u la ong ba kane ka sienjam ka long ban pynshlur ïa ki nongshong shnong ban kynriah noh sha ka leit ka wan kaba kham khuid kham suba.
“Ban kyntiew ïa ki kali ilektrik, ka Kynhun Myntri ka la mynjur ïa ka jingai jingmyntoi kaba kumba T.25,000 na ka bynta ki nongthied. Ha ryngkat kane, yn map pura ruh ïa ka bai pynrung kyrteng. Kumta uno-uno uba thied ïa ka ‘EV’ un ïoh ïa ka jingmyntoi kaba T.25,000 ha ryngkat ka jingpynrung kyrteng ba khlem da donkam siew eiei,” la ong u Marak.
U la bynrap ba ka Jylla ka la don lypa palat 5,000 tylli ki kali ilektrik kiba ïaid ha surok, bad la khmih lynti ba kine ki sienjam bathymmai kin nang pynkiew shuh-shuh ïa kata ka jingkheiñ.
Kane ka polisi kan treikam na ka bynta ki ar-shaka, lai-shaka bad saw-shaka, ryngkat ki jingai jingïarap kiba la pynbeit katkum kawei-pa-kawei ka bynta.
Halor ki jingtei, u Myntri u la ong ba ka Sorkar kam ïohi ba ki ‘Charging Station’ kin long kum ka jingkhanglad.
“Ki ‘Charging Point’ ki lah ban ïeng ha kano-kano ka jaka. Na ka bynta ki ‘Commercial Station’, ngi la dep ban pynithuh ïa ki jaka ha kaba yn sa buh ïa ki,” u la ong.
Ka Kynhun Myntri ka la ïakren ruh halor ka ‘Scrappage Policy’ ïa ki kali hapoh ka Jylla, kaba la pynbna ha u snem ba la dep. Hapoh kane ka saiñdur, ki trai kali kiba pynduh noh ïa ki kali kiba la rim palat ïa ka 15 snem bad pyndonkam ïa ka syrnot ban thied ïa ka ‘EV’ kaba thymmai kin ïoh shuh ïa ka jingai jingïarap. Ïa ka jingkheiñ kaba tikna ym pat lah ban rai ïa mynta.
Da kaba ai nuksa ïa ka Assam, u Marak u la ong ba ki Jylla ba marjan ki la ïaid shaid-shaid shakhmat ha kaba ïadei bad kane ka bynta.
“Ha Assam, ki ‘Scrappage Station’ ki la treikam lypa. Hangne, ka polisi ka dang thymmai, kumta ka jingpdiang ïa ka, ka la nang kiew. Shisien ba phi pyndam noh ïa ka kali rim bad ïoh ïa ka syrnot, phi lah ban aiti sha u DTO bad kam ïa ka jingai jingïarap,” u la batai.
Kumba ka long, ka Meghalaya mynta kam pat don kino-kino ki jaka ba ïadei bad ka ‘Scrappage’. Ka Sorkar ka la ong ba kan kyrshan ïa ki nongseng kam lajong kiba kwah ban bei tyngka ban buh ïa kum kine ki ‘Station’.
“Ka saiñdur jong ka polisi ka long kaba la khreh. Ngin sngewbha ban kyrshan ïa kino-kino ki nongseng kam lajong kiba kwah ban seng ïa ka ‘Scrappage Station’ ha ka Jylla,” la bynrap biang u Marak.
