Nongpoh, Naitung 27
Uwei u samla u la khlad noh hashen katba ar ngut kiwei pat kila mynsaw jur hadien ba ka scooty kaba ki shong, kaba don ïa u registration number ML05-AG-7001 kala shah tynrah ha ka kali kaba la suba jur ba ka lah ban dei ka trok, katkum ka jingpaw ki dak shaka ha katei ka jaka.
Katkum ka khubor bala ïoh lum, ka jingshah tynrah katei ka scooty ka dei ha ka por 12:30 eiei mynstep ha ki bynta jong ka surokbah ha Umiam bad katei ka trok kaba ym lah satia ban tip, kala phet krad na katei ka jaka hadien katei ka jingjia.
Na ka liang ki pulit ka thanad Umiam ki la pyntip ba utei u samla uba la khlad hashen na ka jingmynsaw jur ha ki bynta khlieh, u dei uba la tip kyrteng kum u Rahul Ch Sangma na ka shnong Kasipara, South Garo Hills katba ki ar ngut kiwei pat ym pat ïoh kyrteng satia bad ki dang don mynta hapdeng ka jingshah sumar ha Civil Hospital Shillong.
Ïa ka met kaba sah jong utei u samla uba la khlad la pynkit noh sha jaka buh metïap jong ka Nongpoh Civil Hospital na ka bynta ban pyndep ïa ka eksamin post mortem bad na ka liang ki bor pulit ki dang pynlong ïa ka jingtohkit halor kane ka jingjia.
