Shillong, Naitung 27
Ka Khun Hynñiewtrep National Awakening Movement (KHNAM) ha ka lah Sngi u Blei ka la phah da ka jingthoh sha u Chief Executive Member (CEM) ka Khasi Hills Autonomous District Council (KHADC) ban dawa ba ka Executive Committee (EC) ka dei ban khot da ka ‘Open Tender’ haba ïadei ka jingai wai ïa ki khyrdop lum khajna ‘(Checkgate) jong ka Council.
Kane ka jingdawa jong ka KHNAM ka dei hadien ba ka la ïoh jingtip lyngba ka RTI ba ka la pan na ka ophis jong ka Khasi Hills Autonomous District Council bad ba la lap ba mih tam sa kawei pat ka khyrdop lum khajna kaba khlem ai jingpyntip paidbah ha ka por ba ai Tender.
Ha ka kyrwoh khubor u Working President ka KHNAM u Bah Thomas Passah u la pynpaw ba ha u snem 2025, ka seng ka la pan RTI na ka tnad Trade jong ka KHADC haba ïadei ka jingdon jong ki khyrdop lum khajna (Checkgate) bad ka jubab ba ka ïoh pdiang ka long ba ka Council ka la aiwai ïa 10 tylli ki khyrdop lum khajna sha ki riew shimet khlem da khot kano-kano ka Tender lane ka Notice Inviting Tender.
Halor kane na ka liang ka Council ka la pynshai ba ka jingbymlah ban khot Tender ka dei namar ka jingkhim palat ka por ban khot Tender.
Na ka liang ka KHNAM ka pynpaw ba ka la khmih lynti ïa ka jingkylla ha ki por ban dang wan, hynrei ha u bnai Naitung 2026 ka la pan RTI biang bad ka la lap ba ka Council ka la ai wai ïa ki 11 tylli ki khyrdop lum khajna lyngba ka tnat Trade.
Ki 11 tylli ki khyrdop lum khajna ka Council ki kynthup kaba ha Mawshynrut ba ïa ka Work Order la ai ha ka 8 tarik Nohprah 2025, ha Bangli South West Khasi Hills ba ïa ka Work Order la ai ha ka 21 tarik Jymmang 2026, ha Borsora SWKH ba ïa ka Work Order la ai ha ka 21 tarik Jymmang 2026, ha Byrnihat ba ïa ka Work Order la ai ha ka 21 tarik Jymmang 2026, ha Mawïong Khri ba ïa ka Work Order la ai ha ka 20 tarik Kyllalyngkot 2026, ha Umïam ba ïa ka Work Order la ai ha ka 22 tarik Jymmang 2026, ha Athiabari, WKHD ba ïa ka Work Order la ai ha ka 22 tarik Jymmang 2026, ha Baridua, Ri-Bhoi ba ïa ka Work Order la ai ha ka 29 tarik Risaw 2025, ha Majai ba ïa ka Work Order la ai ha ka 20 tarik Jymmang 2026, ha Mawryngkneng ba ïa ka Work Order la ai ha ka 14 tarik Ïaïong 2026 bad ha Nongprut, Nongstoiñ ba ïa ka Work Order la ai ha ka 29 tarik Jylliew 2026.
“Kaba sngewlyngngoh ka long ba mynta u snem 2026 la mih tam sa kawei ka khyrdop lum khajna na ka 10 tylli kiba don ha u snem 2025 bad kaba kham sngewlyngoh shuh-shuh ka long ba wat hadien shisnem tam ruh ka KHADC ka khlem pynlait kotkhubor bad ka khlem khot da ka Tender ban pynïaid ïa kine ki khyrdop” la pynpaw u Bah Thomas.
Haba bynrap u Bah Thomas u la pynpaw, “Ngi kwah ban pynpaw ba wat ïa ki kam Contract, Supply, repair ter-ter ka Council ka la shu ai sha ki riew shimet khlem kano-kano ka jingkhot Tender. Ngim lah khlem da klet ba ki EC kiba rim ki la shu leh sop-sop ïa kine ki kam Contract bad ki khlem treh ban pynbeit wat hadien ki jingthoh kiba bun kiba ngi la phah sha ki, ngi khmih lynti ba ka ktien bad ka kam kin ïaid lang.”
